ජාත්‍යන්තර ක්‍රිකට් කවුන්සිලය විසින් ශ්‍රී ලංකා ක්‍රිකට්හි සාමාජිකත්වය වහාම ක්‍රියාත්මක වන පරිදි අත්හිටුවා තිබේ.
ජාත්‍යන්තර ක්‍රිකට් කවුන්සිලය නිවේදනයක් නිකුත් කරමින් පවසන්නේ, ශ්‍රී ලංකා ක්‍රිකට්හි ක්‍රියාකාරීත්වය, ස්වාධීනත්වය, එහි පරිපාලනය සම්බන්ධයෙන් රජයේ මැදිහත් වීමක් නොමැති බවට තහවුරු විය යුතු බවයි.
මීට අදාළ කරුණු තවදුරටත් සලකා බැලීම ඉදිරියේ දී සිදු කිරීමට අපේක්ෂා කරන බව එම කවුන්සිලය නිකුත් කළ නිවේදනයේ සඳහන්ය.
ජාත්‍යන්තර ක්‍රිකට් කවුන්සිලයේ අධ්‍යක්ෂ මණ්ඩලය මාර්ගගත ක්‍රමය ඔස්සේ ශ්‍රී ලංකාවේ ක්‍රිකට් සම්බන්ධයෙන් සාකච්ඡාවක් පවත්වා ඇති අතර, ඉන් අනතුරු ව මෙම තීරණය ගෙන තිබේ.
එම කවුසිලයේ විශේෂ හමුවක් නොවැම්බර් 18-21 කාලයේ දී ඉන්දියාවේ අහමදාබාද්හි දී පැවැත්වීමට නියමිත බව වාර්තා වේ.
අනතුරු ව නොවැම්බර් 21 වැනිදා පැවැත්වෙන අධ්‍යක්ෂ මණ්ඩල හමුවේ දී ශ්‍රී ලංකා ක්‍රිකට් සම්බන්ධයෙන් ගත යුතු අනෙකුත් තීරණ ගැන සාකච්ඡා කිරීමට නියමිත බව සඳහන්ය.
මෙම ක්‍රිකට් තහනම ශ්‍රී ලංකා ක්‍රිකට් ආයතනයේ ඉල්ලීම මත සිදු කළ බව ‘ක්‍රික්ඉන්ෆෝ’ වෙබ් අඩවිය වාර්තා කරයි.
මේ වන විටත් ඉන්දියාවට ගොස් ඇති ශ්‍රී ලංකා ක්‍රිකට් සභාපති ෂම්මි සිල්වා මහතා මෙම තීරණය ගැනීම සඳහා රැස්වූ කමිටු රැස්වීමට සහභාගී කරවාගෙන ඇති බව ද ක්‍රික්ඉන්ෆෝ වෙබ් අඩවිය පෙන්වා දෙයි.
එමෙන්ම ඉදිරියේ දී අහමදාබාද්හි පැවැත්වීමට නියමිත අයිසීසී රැස්වීම සඳහා ද ඔහු සහභාගී වීමට නියමිත බව තවදුරටත් වාර්තා වේ.
ක්‍රික්ඉන්ෆෝ වෙබ් අඩවිය තවදුරටත් පෙන්වා දෙන අන්දමට ශ්‍රී ලංකාවේ 2014 – 2015 කාලය තුළ ක්‍රිකට් අතුරු කමිටුවක් ක්‍රියාත්මක වූ අවස්ථාවේ එය ජාත්‍යන්තර ක්‍රිකට් කවුසිලය විසින් පිළිගෙන ඇති බවයි.
2023 ලෝක කුසලාන තරගාවලියේ ශ්‍රී ලංකා ක්‍රිකට් කණ්ඩායම අඛණ්ඩ ව තරග පරාජය වීමත් සමඟ හිටපු ක්‍රිකට් නායක අර්ජුණ රණතුංග මහතා ගේ සභාපතීත්වයෙන් යුත් ක්‍රිකට් අතුරු පාලක මණ්ඩලයක් පත් කිරීමට ක්‍රිඩා අමාත්‍ය රොෂාන් රණසිංහ මහතා පියවර ගත්තේය.
කෙසේ වෙතත් ඊට එරෙහි ව ක්‍රිකට් ආයතනයේ සභාපතිවරයා අභියාචනා අධිකරණයේ නඩුවක් ගොනු කිරීමට පියවර ගැනීමත් සමඟ අතුරු පාලක මණ්ඩලය දින 14කට අත්හිටුවමින් අතුරු තහනමක් අභියාචනා අධිකරණය මඟින් පැනවිණි.
අනතුරු ව මේ පිළිබඳ පාර්ලිමේතුව තුළ දැඩි කතා බහක් මතු වූ අතර, ශ්‍රී ලංකා ක්‍රිකට් ආයතනයේ සභාපතිවරයා ඇතුළු නිලධාරී මණ්ඩලය ඉවත් කිරීම සම්බන්ධයෙන් වන විවාදයක් සිදු කර ඒකාබද්ධ යොජනාව පාර්ලිමේන්තුවේ දී සම්මත කිරීමට පියවර ගත්තේය.
මේ අතර, ශ්‍රී ලංකා ක්‍රිකට් ආයතනය ලබන 14 වැනිදා කෝප් කමිටුව හමුවට කැඳවීමට ද තීරණය කර තිබේ.
මෙවන් පසුබිමක් තුළ ජාත්‍යන්තර ක්‍රිකට් කවුන්සිලය මඟින් ශ්‍රී ලංකා ක්‍රිකට්හි සාමාජිකත්වය වහාම ක්‍රියාත්මක වන පරිදි අත්හිටුවීමට පියවර ගෙන ඇත.