අන්තනගලු ඔයේ ජල මට්ටම ඉහළ යාම හේතුවෙන් ගම්පහ, ජාඇළ ඇතුළු ප්‍රදේශවල පහත් බිම්වලට ගංවතුර අවදානමක් පවතින බව වාරිමාර්ග දෙපාර්තමේන්තුව පවසයි.
එහි අධ්‍යක්ෂ එස්.පී.සී සුගීස්වර මහතා සඳහන් කළේ, මේ පිළිබඳ ජනතාව අවධානයෙන් පසුවිය යුතු බවය.
“අත්තනගලු ඔයේ දරා ප්‍රදේශවලට ඊයේ සවස් කාලයේ සිට ඇති වු වැසි තත්ත්වය නිසා විශේෂයෙන්ම අත්තනගලු ඔය ඉහළ ප්‍රදේශවල ජල මට්ටම සැලකිය යුතු ලෙස ඉහළ ගොස් තිබෙනවා. මේ අනුව අත්තනගලු ඔය ද්‍රෝණියේ අත්තනගල්ල, ගම්පහ, ජාඇළ, වත්තල ඇතුළු අත්තනගලු ඔය දෙපස පහත් බිම් ප්‍රදේශවල සුළු ගංවතුර අවධානමක් පවතින බව සඳහන් කර යුතුයි. මේ අනුව අත්තනගලු ඔය ද්‍රෝණියේ පහත් බිම් ප්‍රදේශ හරහා වැටී ඇති මාර්ග භාවිතා කිරීමේදී ඉතා දැඩි සැලකිල්ලකින් කටයුතු කරන ලෙස එම මාර්ග භාවිතා කරන රියදුරු මහත්වරු සහ ඒ වගේම රථ වාහන මගීන්ගෙන් ඉල්ලා සිටිනවා. මෙම තත්ත්වය තවදුරටත් අද දිනය තුළ සුළු වශයෙන් වර්ධනය වීමේ හැකියාවක් පවතින නිසා මේ තත්ත්වය සම්බන්ධයෙන් විශේෂයෙන් සැලකිලිමත් වන ලෙස එම ප්‍රදේශවල පදිංචි මහා ජනතාවගෙන් ඉල්ලා සිටිනවා.”
එමෙන්ම නිල්වලා ගඟ අවට පහත් බිම් ප්‍රදේශ ආශ්‍රිතව ගංවතුර අවදානමක් පවතින බව එස්.පී.සී සුගීස්වර මහතා වැඩිදුරටත් සඳහන් කළේය.
“ඒ වගේම නිල්වලා ගංගාවේ පහළ ප්‍රදේශවල විශේෂයෙන් අකුරැස්ස, මාලිම්බඩ, මාතර, තිහගොඩ වැනි ප්‍රදේශීය ලේකම් කොට්ඨාසවල නිල්වලා ගඟ ජල මට්ටම නැවත සුළු වශයෙන් වර්ධනය වෙමින් පවතින නිසා නැවත ගංවතුරේ බලපැම් යම් යම් ස්ථානවල වර්ධනය වීමේ හැකියාව පවතින නිසා එම ප්‍රදේශවල පදිංචි ජනතාවත්, ඒ වගේම එම ප්‍රදේශ හරහා විශේෂයෙන්ම අතුරු මාර්ග භාවිතා කරන රියදුරුන් සහ මගීන් අවධානයෙන් කටයුතු කළ යුතු බව සඳහන් කළ යුතුයි. ඒ වගේම කළු ගඟේ අතු ගංගාවක් වන කුඩා ගඟේ විශේෂයෙන්ම බුලත්සිංහල, පාලින්දනුවර සහ මදුරාවල වැනි ප්‍රදේශීය ලේකම් කොට්ඨාසවලත් කුඩා ගඟ දෙපස පහත් බිම්වල සුළු ගංවතුර තත්ත්වයක් මේ වන විට පවතිනවා.”