වාර්ගික හා ආගමික ගැටලු විසඳා ගැනීම ගැන ජනපති ගෙන් ප්‍රකාශයක්
සියලු දෙනාම ශ්‍රී ලාංකිකයන් ලෙස වාර්ගික හා ආගමික ගැටලු විසඳා ගැනීමට කැප විය යුතු බව ජනාධිපති රනිල් වික්‍රමසිංහ මහතා පවසයි.
ජනවාර්ගික සහ ආගමික ගැටලුවලට විසඳුම් ලබා නොදී රටක් ලෙස ඉදිරියට යා නොහැකි බව ජනාධිපතිවරයා අවධාරණය කර තිබේ.
ඒ සඳහා කඩිනම් විසඳුමක් ලබා ගැනීම වෙනුවෙන් තමන් සියලු නායකයන් සමඟ සාකච්ඡා කරන බව ජනාධිපති රනිල් වික්‍රමසිංහ මහතා පෙන්වා දී ඇත.
පසුගිය සමයේ රටේ ආර්ථිකය සම්පූර්ණයෙන් කඩා වැටීම හේතුවෙන් අත්විඳිමට සිදු වූ දරුණුම අත්දැකීමට ජාති, ආගම් බේදයකින් තොර ව රටේ සියලු ජනතාවට මුහුණ පෑමට සිදු වූ බව ප්‍රකාශ කළ ජනාධිපතිවරයා සියලු බෙදීම් අවසන් කර වර්තමානයේ රට වෙනුවෙන් සියලු දෙනා එකට එක් ව ඉදිරියට ගමන් කළ යුතු බව ප්‍රකාශ කර තිබේ.
මඩකලපුව ශාන්ත මයිකල් විද්‍යාලයට වසර 150ක් පිරීම නිමිත්තෙන් පැවති උත්සවයකට එක්වෙමින් ජනාධිපති රනිල් වික්‍රමසිංහ මහතා මේ බව සඳහන් කළ බව ජනාධිපති මාධ්‍ය අංශය සඳහන් කරයි.
එම විද්‍යාලයේ සිසුන් ජාතික ගීය සිංහල මෙන්ම දමිළ භාෂාවෙන් ද ගායනා කළ අතර, ඒ පිළිබඳ අදහස් දැක්වූ ජනාධිපති රනිල් වික්‍රමසිංහ මහතා පැවසුවේ, ජාතික ගීයෙන් ප්‍රකාශ වන්නේ, අප සියලු දෙනා එක මවක ගේ දරුවෝ බවත් එබැවින් එය සිංහල භාෂාවෙන් ගායනා කළත් දමිළ භාෂාවෙන් ගායනා කළත් ගැටලුවක් නොවන බවත්ය.
අද අවශ්‍ යව ඇත්තේ, සියලු දෙනා එකට එක් ව එක ම ජාතියක් ලෙස ඉදිරියට යාම වන අතර, බෙදී වෙන් වී එකිනෙතා හා සටන් කිරීම හේතුවෙන් ශ්‍රී ලංකාව රටක් ලෙස පහතට ඇද වැටුණු බවත් දේශපාලනික වශයෙන් ඇති බෙදීම ශ්‍රී ලංකාව ඉතා අසීරුතාවකට පත්කර ඇති බවත් ජනාධිපතිවරයා පෙන්වා දී ඇත.
රටේ ප්‍රශ්න රට තුළම විසඳා ගත යුතු අතර, ඒ සඳහා ජාත්‍යන්තරයට යා යුතු බව තමා විශ්වාස නොකරන බව ද ජනාධිපති රනිල් වික්‍රමසිංහ මහතා එහි දී වැඩිදුරටත් සඳහන් කළ බව ජනාධිපති මාධ්‍ය අංශය නිවේදනය කරයි.