යතුරුපැදියකින් පැමිණි වෙඩික්කරුවන් දෙදෙනෙකු විසින් පසුගිය අගෝස්තු මස 25 වනදා තලංගමදී පුද්ගලයෙකුට වෙඩිතබා ඝාතනය කර තිබුණි.
ඒ අනුව, පොලීසිය හඳුනාගෙන තිබුණේ සුපුන් ආකාශ් හෙවත් “කොට සුපුන්” නැමැත්තෙක් එම වෙඩිතැබීම සිදුකර ඇති බවය.
අනතුරුව ඔහු සම්බන්ධයෙන් විමර්ශනය කළ පොලිස් විශේෂ කාර්ය බළකා බුද්ධි කොට්ඨාසයට තොරතුරක් ලැබී තිබුණේ කොට සුපුන් ඇතුළු කණ්ඩායමක් වග දුම්රිය ස්ථානය පසුපස පිහිටි ඉඩම් කැබලිකර විකුණන ස්ථානයක තවත් අපරාධයක් සඳහා සූදානම් වන බවටය.
ඉන්පසුව කොට සුපුන් විදෙස්ගතවීමට සූදානම්ව සිටින බවටත් විමර්ශන නිලධාරීන් අනාවරණය කරගෙන තිබුණි.
ඒ අනුව ඔහුව අත්අඩංගුවට ගැනීම සඳහා විශේෂ කාර්ය බළකා නිලධාරීන් 30දෙනෙකුගෙන් පමණ සමන්විත කණ්ඩායමක් එම ප්‍රදේශයට ඊයේ (07) අලුයම 3.30ට පමණ ගොස් ඇති බව පොලීසිය පැවසීය.
එම අවස්ථාවේදී කණ්ඩායම් තුනක් අදාළ ස්ථානයට රහසිගතව ළඟාවනවාත් සමගම එහි සිටි පුද්ගලයෙකු විමර්ශන නිලධාරීන් වෙතට වෙඩිතබා තිබේ.
අනතුරුව එම ස්ථානයේ සිටි තවත් අයෙක් එස්.ටී.එෆ් නිලධාරීන් දෙසට පිස්තෝල වර්ගයේ ගිනි අවියකින් වෙඩිතබමින් එම ස්ථානයෙන් පළාගොස් ඇති බව පොලීසිය සඳහන් කළේය.
පසුව විමර්ශන නිලධාරීන් සිදුකළ සොයාබැලීමේදී “කොට සුපුන්” නැමැත්තා ටී 81 වර්ගයේ ස්වයංක්‍රීය ගිනි අවියක් සමග පපුවට වෙඩි වැදී බිම වැටී සිට තිබේ.
එම අවස්ථාවේදීම ඔහුව රෝහල වෙත රැගෙන ගියත් ඔහු එහිදී මියගොස් ඇති බව පොලීසිය පැවසීය.
ඔහු යුද හමුදා කමන්ඩෝ රෙජිමේන්තුවේ සේවය කර පසුගිය අප්‍රේල් මාසයේදී ඉන් පළා ආ අයෙකි.
එමෙන්ම ඔහු ලඩියා හා ගඩ්ඩා නමැති සංවිධානාත්මක අපරාධකරුවන්ගේ සමීපතමයෙකු බව පොලීසිය පැවසීය.
මියගිය පුද්ගලයා රැඳී සිටි ස්ථානය පරීක්ෂා කිරීමේදී එහි වූ බෑගයක් තුළ තිබී අත්බෝම්බයක් සහ ව්‍යාජ අංක තහඩු සහිත යතුරුපැදියක් පොලිස් විශේෂ කාර්ය බළකා බුද්ධි කොට්ඨාසය විසින් සොයාගනු ලැබීය.