මහරගම සීතා ඇතින්නට යකඩ මූණිස්සම් භාවිත කරමින් වෙඩි තබා ඇති බව වෛද්යවරුන් සඳහන් කළ බව ඇතින්නගේ භාරකරු පවසයි.
ඔහු චෝදනා කරන්නේ ඇතින්නගේ ප්රතිකාර සඳහා ද වගකිවයුතු රාජ්ය ආයතන නිසි මැදිහත්වීමක් සිදුනොකරන බවය.
මේ අතර සීතා ඇතින්නට වෙඩි තැබීමේ සිද්ධිය සම්බන්ධයෙන් අපක්ෂපාති පරීක්ෂණයක් සිදුකරන ලෙසට වැඩබලන ආරක්ෂක අමාත්ය ප්රමිත බණ්ඩාර තෙන්නකෝන් මහතා ද අදාළ පාර්ශවයන් වෙත නියෝග කර ඇත.
මහියංගනය රජමහා විහාරයේ අවසන් රන්දෝලි පෙරහරට එක්වීමෙන් පසුව මහවැලි ගඟ අසබඩ විහාර භූමියේ ගැට ගසා සිටි මහරගම සීතා ඇතින්නට සිවිල් ආරක්ෂක බළකා සෙබළෙකු විසින් රබර් උණ්ඩ මගින් වෙඩි තැබීමේ සිදුවීම වාර්තා වුණේ පසුගිය (30) අලුයම් කාලයේදීය.
මහියංගන පෙරහැර මංගල්ය සඳහා විවිධ ප්රදේශවලින් අලි ඇතුන් සහභාගිවන බැවින් විහාර භූමියට එන වන අලි පලවා හැරීම සඳහා විහාරාධිපති හිමියන් සිදුකළ ඉල්ලීමක් මත එහි රාජකාරි සඳහා කැඳවා සිටි වනජීවි දෙපාර්තමේන්තුවට අනුයුක්ත සිවිල් ආරක්ෂක බළකා සෙබළෙකු විසින් මෙම වෙඩි තැබීම සිදුකර තිබුණි.
පසුව ඔහු පවසා තිබුණේ වන අලියෙකු බවට රැවටී වෙඩි තැබීම සිදුකළ බවය.
වෙඩි තැබීමෙන් ඇතින්නගේ පපු පදෙසට තුවාල සිදුව තිබූ අතර, වෙඩි තැබීම සිදුකළ සිවිල් ආරක්ෂක බළකා සෙබළා පොලීසිය මගින් අත්අඩංගුවට ගෙන අධිකරණයට ඉදිරිපත් කිරීමෙන් පසු ඇප මත මුදා හැර ඇත.
මහරගම සීතා ඇතින්න මෙරට හීලෑ අලි ඇතුන් අතර දළ යුගළක් හිමි ඉතා දුර්ලභ ගණයේ ඇතින්නකි.
චිත්රපට කිහිපයක් සඳහා ද සීතා රංගන දායකත්වය ලබා දී තිබේ.
වෙඩි වැදීමට ලක්වූ සීතා ඇතින්න බැලීමට මේවන විට ප්රදේශවාසින් රැසක් පැමිණෙමින් සිටී.