ජාත්‍යන්තර මූල්‍ය අරමුදලේ නියෝජිතයන් සහ ජනාධිපති රනිල් වික්‍රමසිංහ මහතා අතර ලබන 26 වැනි දින සාකච්ඡාවක් පැවැත්වීමට නියමිත ව තිබේ.
මුදල් රාජ්‍ය අමාත්‍ය ෂෙහාන් සේමසිංහ මහතා සඳහන් කළේ, දිවයිනට පැමිණ සිටින ජාත්‍යන්තර මූල්‍ය අරමුදලේ නියෝජිතයන් මෙම සාකච්ඡාව සඳහා සහභාගි වනු ඇති බවයි.
ජාත්‍යන්තර මූල්‍ය අරමුදලේ දෙවැනි ණය වාරිකය ශ්‍රී ලංකාවට ලබාගැනීම සම්බන්ධයෙන් වන අවසන් සාකච්ඡාව ලෙස ජනාධිපතිවරයා සහ ජාත්‍යන්තර මූල්‍ය අරමුදලේ නියෝජිතයන් අතර අදාළ සාකච්ඡාව පැවැත්වෙනු ඇත.
එම සාකච්ඡාවෙන් අනතුරු ව ජාත්‍යන්තර මූල්‍ය අරමුදලේ දෙවැනි ණය වාරිකය ශ්‍රී ලංකාවට ලබාගැනීම සම්බන්ධයෙන් ගිවිසුමක් අත්සන් කිරීමට ද නියමිත ව ඇති බව වාර්තා වේ.
මේ අතර, ශ්‍රී ලංකාව විසින් බංග්ලාදේශයෙන් ලබාගත් අමෙරිකානු ඩොලර් මිලියන 200ක ණය මුදල ගෙවා අවසන් කර ඇති බව මුදල් රාජ්‍ය අමාත්‍ය ෂෙහාන් සේමසිංහ මහතා සඳහන් කරයි.
අදාළ ණය මුදලේ අවසන් වාරිකය ලෙස අමෙරිකානු ඩොලර් මිලියන 50ක් සහ පොලිය ලෙස ඩොලර් මිලියන 4යි දශම 5ක් පසුගියදා බංග්ලාදේශය වෙත ගෙවා ඇති බව වාර්තා වේ.
ශ්‍රී ලංකාවේ පැවති ඩොලර් හිඟය හේතුවෙන් පසුගිය 2021 වර්ෂයේ අමෙරිකානු ඩොලර් මිලියන 200ක මෙම ණය මුදල බංග්ලාදේශයෙන් ලබාගත් අතර, එය වාරික 03කින් ගෙවා නිම කිරීමට ශ්‍රී ලංකා රජය පියවර ගෙන තිබුණු බව මුදල් රාජ්‍ය අමාත්‍ය ෂෙහාන් සේමසිංහ මහතා සඳහන් කරයි.