සෞඛ්‍ය අමාත්‍යාංශයේ ඉල්ලීම පරිදි විශ්‍රාම ගැනීමෙන් පසුව සේවයේ නිරත විශේෂඥ වෛද්‍යවරුන් හට මෙතෙක් කිසිදු දීමනාවක් හෝ වැටුපක් ලබා දී නොමැති බව එම වෛද්‍යවරුන් පවසයි.
රටේ පවතින සමස්ථ බුද්ධිගලනය හේතුවෙන් සෞඛ්‍ය කේෂ්ත්‍රයට දැඩි බලපෑමක් එල්ලවීම හේතුවෙන් වෛද්‍යවරුන් විශ්‍රාම ගැනීමේ වයස් සීමාව අවුරුදු 63 දක්වා දීර්ඝ කළේය.
එහෙත් එම වෛද්‍යවරුන්ගේ කැමැත්ත පරිදි ඔවුන්ට තවත් වසර 02ක් කොන්ත්‍රාත් පදනම මත සේවයේ නිරතවීමට අවස්ථාව ලබාදීමට සෞඛ්‍ය අමාත්‍යාංශය පියවර ගත්තේය.
ඒ අනුව මේ වසරේ විශ්‍රාම යෑමට නියමිතව සිටි විශේෂඥ වෛද්‍යවරු 60 දෙනෙකුගෙන් 53 දෙනෙකු විශ්‍රාම ගොස් ඇති අතර 07 දෙනෙකු සෞඛ්‍ය අමාත්‍යාංශයේ ඉල්ලීම පරිදි නැවත සේවයට බැඳී තිබේ.
වැඩිදුරටත් තොරතුරු වාර්තාවන්නේ මෙම විශේෂඥ වෛද්‍යවරුන් 07 දෙනාටද මේ දක්වාත් වැටුපක් හෝ විශ්‍රාම වැටුපක් ලබාදීමට සෞඛ්‍ය අමාත්‍යංශය පියවර ගෙන නොමැති බවය.
මෙම වෛද්‍යවරුන් 07 දෙනා අතරට උපදේශන රුධිර පාරවිලයන විශේෂඥයින් දෙදෙනෙක්, ශල්‍ය වෛද්‍යවරයෙක්, උපදේශන වෛද්‍යවරයෙක්, ප්‍රසව සහ නාරි වෛද්‍යවරයෙක් සහ නිර්වින්දන වෛද්‍යවරයෙක් ඇතුළත් වෙයි.
විශ්‍රාම යෑමෙන් පසු යළි සේවයට වාර්තා කළ හෝමාගම රෝහලේ ජ්‍යේෂ්ඨ විශේෂඥ ශල්‍ය වෛද්‍ය ධම්මික වික්‍රමසේකර මහතා පැවසුවේ මේ හේතුවෙන් ඔවුන්ට දැඩි අපහසුතාවයකට මුහුණපෑමට සිදුව ඇති බවය
මේ සම්බන්ධයෙන් සෞඛ්‍ය අමාත්‍යංශ ලේකම් ජනක ශ්‍රී චන්ද්‍රගුප්ත මහතාගෙන් අද දෙරණ විමසීමක් කළේය.
එහිදී ඔහු සදහන් කළේ මෙම ගැටලුව සම්බන්ධයෙන් රාජ්‍ය සේවා කොමිෂන් සභාවට දැනුම් දී ඇතත් ඔවුන් මේ දක්වා ඒ සම්බන්ධයෙන් නිසි විසඳුම් ලබා දී නොමැති බවය.