පවතින නියං තත්ත්වය මෙරට දියර කිරි නිෂ්පාදනයෙන් දෙවන ස්ථානය ගෙන සිටින වයඹ පළාතේ කිරි නිෂ්පාදනයටත් දැඩි බලපෑම් එල්ල කර ඇති බව වාර්තා වෙයි.
දැඩි අව් රෂ්මිය හමුවේ ගවයන්ට ආහාර සඳහා සුදුසු තෘණ භූමි වියැළී ගොස් ඇති අතර, කිරි ගොවීන් පවසන්නේ, ඉදිරි සතිවල දී නියං තත්ත්වය උග්ර වුවහොත් දියර කිරි ප්රමාණය සියයට පනහකින් පමණ අඩු විය හැකි බවයි.
සාමාන්යයෙන් මෙරට කිරි නිෂ්පාදනය ලීටර් මිලියන 1,250 ඉක්මවන අතර ඉන් සියයට 18කට වැඩි දායකත්වයක් සැපයෙන්නේ වයඹ පළාතෙනි.
පසුගිය ජූලි මාසයේ වයඹ පළාතේ දියර කිරි නිෂ්පාදනය කිරි ලීටර් 156,000ක් ලෙසට සටහන් වුවත් ඉදිරි සතිවල දී නියඟය උග්ර වුවහොත් දියර කිරි ප්රමාණය සියයට පනහකින් පමණ අඩු විය හැකි බව කිරි ගොවින් පවසයි.
වයඹ පළාත පුරා ගවගාල් තිස් පන්දහසක් පමණ පවතින අතර, ඒ තුළ සිටින ගවයන් දෙලක්ෂ විසි පන්දහසකට පමණ පවතින නියඟයෙන් බලපෑම් එල්ල වී තිබේ.
ප්රදේශය පුරා තෘණ භූමි වියැළී යාම නිසා ගවයන්ට සුදුසු තෘණ සොයා ගැනිමට නොහැකි වීමෙන්
ගවගාල් හිමියන් ද පත් ව ඇත්තේ, දැඩි අපහසුතාවකටයි.
දිවයිනට බලපා ඇති වියළි කාලගුණික තත්ත්වය තවදුරටත් ප්රදේශ රැසකට බලපෑම් එල්ල කරමින් පවතින බව සඳහන්ය.
මේ අතර, අම්පාර දිස්ත්රික්කයේ තිරුක්කෝවිල් ප්රදේශයේ පිහිටි කුඩා වැව්වල මේ වනවිට ජලය සිඳී ගොස් ඇති බව වාර්තා වේ.
තිරුක්කෝවිල් හී පිහිටි මන්නම්කුලම වැවේ මේ වනවිට ඉතිරිව ඇත්තේ ඉතාම සුළු ජල ප්රමාණයක් පමණක් බව සඳහන්ය.
මේ හේතුවෙන් සාගම ප්රදේශයේ තෘණ භූමි වියැළී යාමෙන් ප්රදේශයේ ගවයන්ට ආහාර සහ ජලය සපයා ගැනීම ගැටලුවක් වී තිබේ.
මේ අතර, පොලොන්නරුව දිස්ත්රීක්කයට අයත් පැරණිතම ගම්මානයක් ලෙසට සැලකෙන මින්නේරිය රත්මලේ ගම්මානයේ පිහිටි රත්මලේ වැවේ ජලය සිඳී යාමෙන් එම ගම්වාසීන් ද පත් ව ඇත්තේ දැඩි අපහසුතාවන්ටයි.
මාස 04ක පමණ කාලයක සිට වර්ෂාව නොමැතිකමෙන් රත්මලේ වැව මෙන්ම ප්රදේශයේ ළිංවල ජලය ද සිඳී යාමෙන් ගම්මානයේ පවුල් දහසකට පමණ බලපෑම් එල්ල වී තිබේ.