ඊයේ (22) සවස හපුතලේ පොලිස් වසම, අයිස්පීල්ල ප්‍රදේශයේ හෝටලයක් තුළ සිදුවූ වෙඩි තැබීමකින් පුද්ගලයකු මිය ගිය බව පොලීසිය වාර්තා කළේය.
හෝටලය තුළට පැමිණි පුද්ගලයන් පස් දෙනෙකු විසින් වෙඩි තැබීම සිදුකර ඇති අතර, හෝටල් හිමිකරුවා සහ ඔහු සමඟ සිටි පුද්ගලයකු වෙඩි ප්‍රහාරයට ලක් වී තිබිණි.
වෙඩි වැදීමෙන් හෝටල් හිමිකරු සමඟ සිටි පුද්ගලයා එම ස්ථානයේම මියගොස් ඇති අතර, හෝටල් හිමිකරු බරපතළ තුවාල ලබා දියතලාව රෝහලට ඇතුළත් කර ඇත.
මරණකරු වයස අවුරුදු 47ක් වූ ගන්දර ප්‍රදේශයේ පදිංචිකරුවකු බව පොලීසිය වාර්තා කරයි.
මේ අතර, මියගිය පුද්ගලයා මාතර මහාධිකරණයේ විභාග වූ නඩුවක සාක්ෂිකරුවකු බව අනාවරණය වී ඇතැයි පොලීසිය සඳහන් කර ඇත.
සිද්ධිය පිළිබඳ හපුතලේ පොලීසිය වැඩිදුර විමර්ශන සිදුකරයි.
මේ පිළිබඳ අද (23) මාධ්‍ය හමුවක් කැඳවමින් පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී නිහාල් තල්දූව මහතා පැවසුවේ, මියගිය පුද්ගලයා 2005 වර්ෂයේ ගන්දර පොලිස් වසමේ සිදුවූ ඝාතනයකට සම්බන්ධ ව මාතර මහාධිකරණයේ සාක්ෂි ලබා දී ඇති බවයි.
එසේ ඔහු ලබාදුන් සාක්ෂි මත නඩුවේ චූදිතයන් සිව් දෙනෙකුට අධිකරණය විසින් සිරදඬුවම් ද ලබා දී ඇත.
ඒ හේතුවෙන් මියගිය පුද්ගලයාට ජීවිත තර්ජනයක් තිබී ඇති බවත් මාධ්‍ය ප්‍රකාශකවරයා සඳහන් කළේය.
2005-07-23 වන දින මංගලෝත්සවයක් අවස්ථාවක දී දෙපිරිසක් අතර ගැටුමක් ඇති වී ඇති අතර, එම අවස්ථාවේ 19 හැවිරිදි පුද්ගලයකු තියුණු ආයුධවලින් පහර දී ඝාතනයට ලක් ව ඇත.
එම අවස්ථාවේ දී උක්ත මරණකරු ද එම ස්ථානයේ සිට ඇති අතර, මහාධිකරණය විසින් සාක්ෂි කැඳවූ අවස්ථාවේ, ඔහු එම සාක්ෂි ලබාදීම සිදුකර තිබේ.
පසුව ඇතිවූ ජීවිත තර්ජන හේතුවෙන් වින්දිතයන් ආරක්ෂා කිරීමේ පනත යටතේ පොලීසිය විසින් ඔහුට ගන්දර ප්‍රදේශ සීමාවේ දී ජීවිත ආරක්ෂාව ද සපයා ඇති බව වාර්තා වේ.
ඒ අනුව මරණකරුට පොලිස් නිලධාරීන් දෙදෙනෙකුගේ ආරක්ෂාව ලැබී තිබේ.
ඝාතකයන් සෙවීම සඳහා පොලීසිය විසින් විමර්ශන කටයුතු අරඹා ඇති බව පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී නිහාල් තල්දූව මහතා වැඩිදුරටත් අවධාරණය කළේය.