මෙරට ලොකු ලූනු වගාව සම්බන්ධයෙන් වහාම වාර්තාවක් ලබා දෙන ලෙස කෘෂිකර්ම අමාත්‍ය මහින්ද අමරවීර මහතා කෘෂිකර්ම දෙපාර්තමේන්තුවට උපදෙස් ලබා දී තිබේ.
සාර්ථකව සිදුකෙරුණු ලොකු ලූනු වගාව දැනට වසර හත අටක සිට අසාර්ථක වී ඇති අතර, මේ වනවිට ගොවීන් ලොකු ලූනු වගාව අතහැර දමන තත්ත්වයට පත්ව ඇති බවට වාර්තා වන බව අමාත්‍යවරයා පෙන්වා දෙයි.
ඒ අනුව මේ පිළිබඳ සොයා බැලීම සඳහා ලොකු ලූනු වගාව සම්බන්ධයෙන් තමන්ට වහාම වාර්තාවක් ලබා දෙන ලෙස අමාත්‍යවරයා කෘෂිකර්ම දෙපාර්තමේන්තුවට උපදෙස් ලබා දී ඇත.
ශ්‍රී ලංකාවේ වාර්ෂික ලොකු ලූනු අවශ්‍යතාව මෙට්‍රික් ටොන් ලක්ෂ තුනක් වන අතර, මෙම වසර තුළ ජාතික නිෂ්පාදනය මෙට්‍රික් ටොන් 4716ක් වීම හේතුවෙන් ගතවූ කාලය තුළ ආනයනය කර ඇති ලොකු ලූනු ප්‍රමාණය මෙට්‍රික් ටොන් 131,795ක් බව කෘෂිකර්ම අමාත්‍යංශය සඳහන් කරයි.