වියට්නාමය සහ ශ්‍රී ලංකාව අතර ආර්ථික සහයෝගීතාව පුළුල් කිරීමට වියට්නාම රජය සිය එකඟතාව පළකර තිබේ.
ඒ, අග්‍රාමාත්‍ය දිනේෂ් ගුණවර්ධන මහතා සහ වියට්නාම උප ජනාධිපතිවරයා අතර චීනයේ පැවති ද්විපාර්ශ්වික හමුවකදීය.
චීනයේ සංචාරයක නිරත අග්‍රාමාත්‍ය දිනේෂ් ගුණවර්ධන මහතා සහ වියට්නාමයේ උප ජනාධිපති ‘ට්‍රාන් ලු ක්වාං’ මහතා අතර හමුවක් පවත්වා තිබිණි.
එහි දී දෙරට අතර රාජ්‍ය හා පෞද්ගලික අංශයේ දැනට පවතින හවුල් ව්‍යාපාරවලට අමතරව නව වෙළෙඳ සහ ආයෝජන ක්ෂේත්‍ර පිළිබඳ සොයාබලන ලෙස අග්‍රාමාත්‍යවරයා සිදුකළ ඉල්ලීමකට වියට්නාම උප ජනාධිපතිවරයා එකඟතාව පළකර ඇති බව වාර්තා වෙයි.
එමෙන්ම වියට්නාමයේ ආයෝජනයෙන් දැවැන්ත සංවර්ධන ව්‍යාපෘති ක්‍රියාත්මක කිරීම මඟින් වෘත්තිකයන්ට සහ පුහුණු ශ්‍රී ලාංකික ශ්‍රමිකයන්ට රැකියා අවස්ථා උදාවනු ඇති බව අග්‍රාමාත්‍යවරයා මෙහි දී පෙන්වා දී තිබේ.
තේ, පොල්, රබර්, ධීවර, විකල්ප බලශක්ති සහ පතල් කැණීම් කෙරෙහි විශේෂ අවධානයක් යොමු කරමින් කෘෂිකර්මාන්තයේ සහයෝගීතාව පුළුල් කිරීම පිළිබඳව මෙම සාකච්ඡාවල දී අවධානය යොමුවූ බව වාර්තා වෙයි.
එමෙන්ම දෙරට අතර ගුවන් ගමන් වැඩි කිරීම, සංචාරකයන්ගේ පැමිණීම වර්ධනය වීමට ඉවහල් වන බැවින් බෞද්ධ සිද්ධස්ථාන වෙත සංචාරක පැමිණීම් ප්‍රවර්ධනය කිරීම සඳහා සහයෝගයෙන් කටයුතු කිරීමට වියට්නාමය සිය එකඟතාව පළකර තිබේ.