ආණ්ඩුවේ ඇමැතිකම් දරන ශ්‍රී ලංකා නිදහස් පක්ෂයේ මන්ත්‍රීවරුන් නැවත පක්ෂ සමග සම්බන්ධවීම හේතුවෙන් පක්ෂයේ තනතුරු සංඛ්‍යාව ද වැඩි කර ඇත.
පක්ෂයේ මීට පෙර සිටි ජ්‍යෙෂ්ඨ උප සභාපතිවරුන් හතර දෙනාගේ සංඛ්‍යාව මේ වන විට අට දක්වා වැඩි කර ඇත.
ඒ අනුව, නිමල් සිරිපාල ද සිල්වා, මහින්ද අමරවීර, ෂාන් විජයලාල් ද සිල්වා, මහාචාර්ය රෝහණ ලක්ෂ්මන් පියදාස, ලෙස්ලි දේවින්ද්‍ර, ෆයිසර් මුස්තාපා , අංගජන් රාමනාදන් සහ දුෂ්මන්ත මිත්‍රපාල යන මහත්වරුන් පක්ෂයේ ජ්‍යෙෂ්ඨ උප සභාපතිවරුන් ලෙස පත් කර ඇත.
නිමල් සිරිපාල ද සිල්වා සහ මහින්ද අමරවීර යන මහත්වරුන් පක්ෂයේ ජ්‍යෙෂ්ඨ උප සභාපතිවරුන් ලෙස මුලදී කටයුතු කළ අතර ඔවුහු ආණ්ඩුවට එක් වීම හේතුවෙන් එම තනතුරුවලින් ඉවත් කරනු ලැබ සිටියහ.
මේ අතර, පක්ෂයේ උප සභාපතිවරුන් සංඛ්‍යාව 10 සිට 12 දක්වා ද උප ලේකම්වරුන් සංඛ්‍යාව 8 සිට 10 දක්වා ද වැඩි කර ඇත.
ආණ්ඩුවට එක්ව ඇමතිකම් දරන ශ්‍රීලනිප මැති ඇමතිවරුන්ගෙන් වැඩිදෙනකු හිටපු ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් ගිය සතියේ පැවති පක්ෂයේ මධ්‍යම කාරක සභාවටත්, සමස්ත ලංකා කාරක සභාවට සහ විධායක සභා රැස්වීමටත් සහභාගි වී ඇත.