නව කැලණි පාලමේ ඇණ ගැලවීමක් සිදුවී නොමැති බව ප්‍රවාහන හා මහා මාර්ග අමාත්‍ය බන්දුල ගුණවර්ධන මහතා පවසයි.
පාර්ලිමේන්තු මන්ත්‍රී දයාසිරි ජයසේකර මහතා පසු (18) දිනයේ යොමු කළ ප්‍රශ්නයකට පිළිතුරු දෙමින් අමාත්‍යවරයා අද මෙම අදහස් පළ කළේය.
කෙසේ වෙතත් කොළඹ – කටුනායක අධිවේගී මාර්ගයට ඇතැම් පුද්ගලයන් සිදුකර ඇති හානි සම්බන්ධයෙන් ද ප්‍රවාහන අමාත්‍යවරයා මෙහිදී අදහස් පළ කරන ලදි.
වැඩිදුරටත් අදහස් දැක්වූ අමාත්‍ය බන්දුල ගුණවර්ධන,
”යකඩ පාලමේ නිරීක්ෂණ හා නඩත්තු කටයුතු සඳහා පාලමේ යටි පැත්තේ ඉදිකර ඇති පදික පාලමේ ආරක්ෂක ඇඳිවලට යොදා ඇති ජී.අයි බට හොරකම් කරලා තියනවා. පාලමේ එකතු වෙන වැසි ජලය ප්‍රවාහනය සඳහා යොදා ඇති අපවාහන නළ පද්ධතියේ ඇති අධික ඝනකමකින් යුත් පී.වී.සී බට හොරකම් කරලා තියනවා. නව කැලණි පාලමේ සන්නිවේදන ගොඩනැඟිල්ලේ තොරතුරු පරිගණක පද්ධතියේ ආරක්ෂාවට යොදවා තිබූ වායු සමීකරණ යන්ත්‍රවල බාහිරින් සවිකරන කොටස් හොරකම් කරලා තියනවා. නව කැලණි පාලමේ දර්ශනීය ආලෝක රටා මවන විදුලි පහන් ටික හොරකම් කරලා තියනවා. එතකොට කැලණි පාලමට වෙලා තියන අලාභය මෙහෙමයි. ජී.අයි බට හොරකම් කිරීමෙන් මිලියන 4.4යි. වායු සමීකරන කොටස් හොරකම් කිරීමෙන් මිලියන 0.5යි. දර්ශනීය ආලෝක රටා මවන විදුලි පහන් හොරකම් කිරීමෙන් මිලියන 1යි. මුළු අලාභය මිලියන 5.9යි. නව කැලණි පාලමේ කෝටි ගාණක අලාභයක් වෙලා නෑ. ඇණ ගලවලා නෑ. ඒ ඇණ ගලවන්ඩ බෑ. ඒ ඇණ ගලවන්න විශේෂිත උපකරණ ඒ ඉංජිනේරු සමාගමෙන් ගේන්න ඕනේ. එහෙම නැත්තං පාලං අනතුරට ලක් වෙනවා. ඒ නිසා ඇණ ගැලවීමක් නෑ”