දුම්රිය ආරක්ෂක හමුදාවේ ආරක්ෂක නිලධාරී පුරප්පාඩු 300 ක් පමණ නොපිරවීම නිසා එම ආරක්ෂක අංශයේ වැඩ කටයුතු අඩාල වී ඇතැයි දුම්රිය ආරක්ෂක හමුදා ආරංචි මාර්ගවලින් වාර්තා වේ.
දුම්රිය ආරක්ෂක හමුදාවේ පවතින මෙම ආරක්ෂක නිලධාරී පුරප්පාඩු පිරවීමට මුදල් අමාත්‍යංශයේ චක්‍රලේඛයක් හරස් වී ඇති බවත් දැනගන්නට තිබේ.
රාජකාරි කටයුතුවල අවශ්‍යතාවය අනුව 719 දෙනෙකු පමණ සිටිය යුතු දුම්රිය ආරක්ෂක හමුදාවේ දැනට සිටින්නේ ආරක්ෂක නිලධාරීන්. 402 ක් පමණ බවත් මේ වසරේ ඉන් නිලධාරීන් 34 දෙනකු ද ලබන වසරේ නිලධාරීන් 47 දෙනකු ද විශ්‍රාම යාමට නියමිත බව දැන ගැනීමට තිබේ.
දැනට වසර දෙකකට පමණ පෙර දුම්රිය ආරක්ෂක අංශයට නිලධාරීන් බදවා ගැනීම සඳහා තරඟ විභාගයක් පවත්වා ඉන් සමත් වූ 178 දෙනකු සම්මුඛ පරීක්ෂණයක් මගින් ද තෝරා ගෙන ඔවුන් ට පත්වීම් ලිපි පවා නිකුත් කර ඇති බවත් එහෙත් ඔවුන් මෙතෙක් දුම්රිය ආරක්ෂක හමුදාවට බදවා ගෙන නැතැයි ද වාර්තා වේ.