ශ්‍රී ලංකා තායිලන්ත නිදහස් වෙළෙඳ ගිවිසුම පිළිබඳ පස්වැනි සාකච්ඡා වටය ඊයේ පෙරවරුවේ කොළඹදී ආරම්භ වුණා.
කොළඹ ටාජ් සමුද්‍රා හෝටලයේ පැවති එහි සමාරම්භක සැසිවාරය ඇමතු ජාත්‍යන්තර වෙළෙඳ කාර්යාලයේ ශ්‍රී ලංකා නියෝජිත කණ්ඩායමේ ප්‍රධාන සාකච්ඡාකරු කේ.ජේ. වීරසිංහ පැවසුවේ එකඟ වූ කාල රාමුවට අනුව ක්‍රියාත්මක වන ශ්‍රී ලංකා – තායිලන්ත නිදහස් වෙළඳ ගිවිසුමට අදාළ සාකච්ඡාවල ප්‍රගතිය පිළිබඳව තෘප්තිමත් විය හැකි බවයි.
මීළඟ සාකච්ඡා වටය ලබන අගෝස්තු මස 21 සිට 23 දක්වා තායිලන්තයේ පැවැත්වීමට නියමිත බවත් 2024 වසරේ මාර්තු මාසයේදී ගිවිසුමට අත්සන් තැබීමට නියමිත බවත් ඔහු එහිදී සදහන් කළා.
එමෙන්ම 2024 වසරේ පෙබරවාරි මාසයේ පැවැත්වීමට නියමිත අවසන් සාකච්ඡාවට පෙර තවත් සාකච්ඡා වට තුනක් සැලසුම් කර ඇති බවයි ඔහු වැඩිදුරටත් සදහන් කළේ.
ශ්‍රී ලංකා – තායිලන්ත නිදහස් වෙළෙඳ ගිවිසුම පිළිබඳ පස්වැනි සාකච්ඡා වටය ලබන 28 වනදා දක්වා පැවැත්වීමට නියමිතයි.