මහා පරිමාණ මත්පැන් නිෂ්පාදන සමාගම්වලින් අය විය යුතු බදු මුදල් අයකරගැනීමට කඩිනමින් කටයුතු කරන ලෙසට සුරාබදු දෙපාර්තමේන්තුව වෙත උපදෙස් ලබා දී තිබෙනවා. ඒ, එම දෙපාර්තමේන්තුවේ උසස් නිලධාරීන් ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාව හමුවට කැඳවූ අවස්ථාවේදීයි. එම කාරක සභාව, එහි සභාපති පාර්ලිමේන්තු මන්ත්‍රී මහින්දානන්ද අලු‍ත්ගමගේ ප්‍රධානත්වයෙන් පාර්ලිමේන්තු සංකීර්ණයේදී රැස් වූ බවයි පාර්ලිමේන්තු සන්නිවේදන දෙපාර්තමේන්තුව පැවසුවේ. එහිදී පාර්ලිමේන්තු මන්ත්‍රී මහින්දානන්ද අලු‍ත්ගමගේ සුරාබදු නිලධාරීන්ට පෙන්වා දුන්නේ මෙම වසරේ සුරාබදු දෙපාර්තමේන්තුවෙන් මෙම වසරේ අපේක්ෂිත ආදායම රුපියල් බිලියන 217 ක් බවත් ජුනි මස වන විට උපයා ඇත්තේ රුපියල් බිලියන 72යි දශම 985ක් පමණක් බවයි. මේ හේතුවෙන් අපේක්ෂිත ආදායමට සුරාබදු දෙපාර්තමේන්තුව ළඟාවී නැති බවද එම කාරක සභාවේ සභාපතිවරයා පෙන්වා දී තිබෙනවා.
අපේක්ෂිත ආදායමට ළඟාවිය නොහැකිව ඇත්තේ මත්පැන් මිල ඉහළ යාම හේතුවෙන් මත්පැන් නිෂ්පාදනය සහ අලෙවිය අවම වීම නිසා බව ඊට ප්‍රතිචාර දක්වමින් සුරාබදු නිලධාරීන් පැවසූ බවයි පාර්ලිමේන්තු සන්නිවේදන දෙපාර්තමේන්තුව සඳහන් කළේ.
කෙසේ වෙතත් පාර්ලිමේන්තු මන්ත්‍රී මහින්දානන්ද අලු‍ත්ගමගේ පැවසුවේ වසර කිහිපයක සිටම සුරාබදු දෙපාර්තමේන්තුවේ ආදායම වැඩි වී නැති බවයි. මේ හේතුවෙන් මත්පැන් මිල වැඩිවීම පමණක් ආදායම අවම වී ඇති බවට නිරීක්ෂණය නොවන බවද මන්ත්‍රීවරයා එහිදී පෙන්වා දුන්නා. එබැවින් මෙරට පවතින මහා පරිමාණ මත්පැන් නිෂ්පාදන සමාගම්වලින් නිවැදිව බදු අයකරගැනීමට කටයුතු කරන ලෙසත් යම් ආකාරයකින් බදු ගෙවීම පැහැර හරින නිෂ්පාදන සමාගම්වල බලපත්‍ර අහෝසි කිරීමටද පියවර ගන්නා ලෙසත් ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්‍රී මහින්දානන්ද අලු‍ත්ගමගේ එම නිලධාරීන්ට උපදෙස් ලබා දි තිබෙනවා.