එදිරිවාදිකම් ඇති බලවත් රාජ්‍යයන් දෙකක් වන එක්සත් ජනපදය සහ චීනය අතරින් එකක් තෝරා ගැනීමට ආසියාතික රටවලට බල නොකරන්නැයි ජනාධිපති රනිල් වික්‍රමසිංහ මහතා ලෝක බලවතුන්ගෙන් ඉල්ලා සිටියේය.
ජපානයේ නිල සංචාරය අතරතුර, ටෝකියෝ නුවර පැවැත්වෙන ආසියාවේ අනාගතය පිළිබඳ ‘නික්කෙයි’ සමුළුව අමතමින් ජනාධිපතිවරයා මේ බව සඳහන් කළේය.
ජපානයේ නිල සංචාරයක නිරත ජනාධිපති රනිල් වික්‍රමසිංහ මහතා ටෝකියෝ හි පැවැත්වෙන ආසියාවේ අනාගතය පිළිබඳ ‘නික්කෙයි’ සමුළුවේදී ඊයේ (25) දේශනයක් පැවැත්වීය.
මේ අතර ජනාධිපති රනිල් වික්‍රමසිංහ මහතා ජපාන අග්‍රාමාත්‍ය ෆුමිඕ කිෂිඩා මහතා සමග ද්විපාර්ශ්වික සාකච්ඡා පවත්වා තිබුණි.
එහිදී ජපාන රජයේ සහාය මත ක්‍රියාත්මක කෙරෙමින් තිබු කොළඹ සැහැල්ලු දුම්රිය ව්‍යාපෘතිය අතරමඟ නවතා දැමීම පිළිබඳ ජනාධිපති රනිල් වික්‍රමසිංහ මහතා ජපාන රජය වෙත සිය කනගාටුව පළකර තිබේ.
විදෙස් රටක හෝ පාර්ශ්වයක් මැදිහත්වීම ඇතිවී සිදුකරන මහා පරිමාණ ව්‍යාපෘති දෙපාර්ශ්වයේම එකඟතාවයක් නොමැතිව නවතා දැමීම හෝ අවලංගු කිරීමට නොහැකි වන අයුරින් ඉදිරියේදී පාර්ලිමේන්තුවේ නීතී සම්පාදනය කරන බව අවධාරණය කළ ජනාධිපතිවරයා සියලු මහා පරිමාණ ව්‍යාපෘතිවලට අදාළ යෝජනා සහ ව්‍යපෘතියේ වාර්ෂික වාර්තා පාර්ලිමේන්තුවට ඉදිරිපත් කිරීම අනිවාර්ය කරන බවද පවසා ඇත.
එමෙන්ම ආර්ථික අර්බුදයෙන් ගොඩ ඒම සඳහා ජපානය ශ්‍රී ලංකාවට ලබාදෙන සහයෝගය පිළිබඳව එහිදී ජනාධිපතිවරයා සිය ප්‍රසාදය පළ කර සිටියේය.
එසේම ජනාධිපතිවරයා ජපාන මුදල් අමාත්‍ය ෂුනිචි සුසුකි මහතා හමුවූ අතර ශ්‍රී ලංකාවේ ණය ප්‍රතිව්‍යුහගත කිරීම සහ ජාත්‍යන්තර මූල්‍ය අරමුදලේ වැඩසටහන ක්‍රියාත්මක කිරීම පිළිබඳව එහිදී සාකච්ඡා කර තිබේ.
අනතුරුව ජනාධිපතිවරයා ජපාන විදේශ අමාත්‍ය යොෂිමාසා හයාෂි මහතා සමඟද සාකච්ඡාවල නිරතවී ඇත.
එමෙන්ම ජනාධිපති රනිල් වික්‍රමසිංහ මහතා ජපානයේ හිටපු අග්‍රාමාත්‍යවරුන් වන යසුඕ ෆුකුඩා , යොෂිහිඩේ සුගා , ටාරෝ අසෝ යන මහත්වරුන් ද හමුවී සාකච්ඡා පවත්වා තිබේ.