මේ වසරේ මැයි මාසය වන විට දකුණු කොරියානු රැකියා සඳහා ලාංකික ශ්‍රමිකයින් 2,726 දෙනෙකු මෙරටින් පිටත්ව ගොස් තිබෙනවා. ඒ අතරට තරුණීයන් 32 දෙදෙනෙකු ද අයත්. ඔවුන් මෙලෙස පිටත්ව ගොස් ඇත්තේ නිෂ්පාදන, ධීවර සහ ඉදිකිරීම් යන රැකියා ක්ෂේත්‍රවලටයි.
2023 වසරේ ශ්‍රමිකයින් 8,000 ක් පමණ කොරියානු රැකියාවලට බඳවා ගැනීමට කොරියානු මානව සම්පත් දෙපාර්තමේන්තුව එකඟතාවය පළ කර තිබෙනවා.
ඒ සම්බන්ධයෙන් කොරියානු මානව සම්පත් දෙපාර්තමේන්තු වෙබ් අඩවියට දත්ත අතුළත් කර තිබෙනවා. මෙරට රැකියා අපේකෂිත තරුණ තරුණියන්ගෙන් කොරියානු සේවා යෝජකයින් විසින් රැකියා ගිවිසුම් ලබාදීමට තෝරාගෙන ඇති ශ්‍රමිකයින්ව, කඩිනමින් රැකියා සඳහා පිටත්කර හැරීමටයි ශ්‍රී ලංකා විදේශ සේවා නියුක්ති කාර්යාංශය අවශ්‍ය පියවර ගෙන ඇත්තේ.
මේ අතර 2023 වසරට අදාළව දැනට පැවැත්වෙමින් ඇති කොරියානු භාෂා පරීක්ෂණය සඳහා 84,886 ක අයදුම්පත් ප්‍රමාණයක් ලැබී තිබෙනවා.
භාෂා පරීක්ෂණය සඳහා ඉදිරිපත් වන එම පිරිසගෙන් 8,028 දෙනෙකු නිෂ්පාදන සහ ධිවර රැකියා ක්ෂේත්‍රවලට අදාලව සමත් කරනු ලබන බව කොරියානු මානව සම්පත් සංවර්ධන ආයතනය දන්වා ඇති බවයි ශ්‍රි ලංකා විදේශ සේවා නියුක්ති කාර්යාංශය පැවසුවේ.