ලී මෝලක් තුළ එහි හිමිකාරිනියට තියුණු ආයුධයකින් මුඛයට පහරදී සාහසික ලෙස සිදුකළ ඝාතනයක් පිළිබඳව අතුරුගිරිය ප්රදේශයෙන් වාර්තා විය.
ඝාතනයට හේතුව මෙතෙක් අනාවරණ වී නොමැති අතර පොලිස් කණ්ඩායම් කිහිපයක් සිද්ධිය සම්බන්ධයෙන් විමර්ශන සිදුකරයි.
අතුරුගිරිය ගොඩගම පාර ප්රදේශයේ එනම් අතුරුගිරිය පොලීසියේ සිට මීටර් 100ක් පමණ දුරින් පිහිටි ලී මඩුවක් තුළ තියුණු ආයුධයකින් පහරදී ඊයේ පස්වරුවේ එහි හිමිකාර කාන්තාව මෙලෙස ඝාතනය කර තිබුණි.
පොලීසිය පැවසුවේ අදාළ කාන්තාවගේ මුහුණට හා මුඛයට තියුණු ආයුධයකින් පහරදී මෙම ඝාතනය සිදුකර ඇති බවය.
පොලීසියට ලද තොරතුරකට අනුව සිරුර සොයාගන්නා විටත් ඇයගේ මුඛය තුළ ඝාතනය සඳහා භාවිත කළ පිහිය සිරවී තිබී ඇති බව වාර්තා වෙයි.
එම ලී මඩුවෙහි පසුපස කොටසේ තවත් පුද්ගලයෙකු සිහිසුන්ව වැටී සිටියදී සොයාගත් පොලීසිය ඔහුව ද රෝහල්ගත කර තිබුණි.
ඔහු මේ වනවිට කොළඹ ජාතික රෝහලේ දැඩි සත්කාර ඒකකයේ අසධ්ය තත්ත්වයෙන් ප්රතිකාර ලබයි.
පොලීසිය පැවසුවේ අදාළ පුද්ගලයාගේ හිසෙහි පසුපසට දැඩි තුවාල සිදුවී ඇති බවය.
අනතුරුව සිද්ධිය සම්බන්ධයෙන් බස්නාහිර දකුණ අපරාධ කොට්ඨාසය හා අතුරුගිරිය පොලීසිය ඇතුළු පොලිස් කණ්ඩායම් කිහිපයක් එක්වී විමර්ශන ආරම්භ කර තිබුණි.
එහිදී අනාවරණ වී ඇත්තේ මියගිය කාන්තාව 62 හැවිරිදි මංගලිකා මහවත්ත නම් කාන්තාවක් වන අතර තුවාල ලබා රෝහල්ගත කර සිටින පුද්ගලයා එහි වඩුකාර්මිකයෙකු වන මයිලංගම ප්රදේශයේ පදිංචි 52 හැවිරිදි අයකු බවය.
මියගිය කාන්තාව ඊයේ පෙරවරු 8ට පමණ අදාළ ලී මෝල වෙත පැමිණ ඇති අතර මෙම සිදුවීම ඊයේ දහවල් 11ත් 2ත් අතර සිදුවී ඇති බවට පොලීසිය සැක පළකරයි.
ඝාතනයට පෙර ඇය යම් කිසි ව්යාපාර ගනුදෙනුවක් ද සිදුකර ඇතැයි පොලීසියට අනාවරණ වී තිබේ.
ඝාතකයා එහිදී තුවාල ලැබූ පුද්ගලයා පසු පස එලවා විත් ලී මඩුව පසුපසදී ඔහුගේ හිසට පහරදී ඇත්තේ ඔහු තමාව හඳුනා ගැනීම නිසා විය හැකි බවට පොලීසිය සැක කරයි.
වඩුකාර්මිකයා නිවසට නොපැමිණීම නිසා ඔහුගේ බිරිඳ හා දරුවා පොලීසියට කළ පැමිණිල්ලකින් පසු සිදු කළ සෝදිසියේදී පොලීසිය විසින් මිය ගිය කාන්තාව හා තුවාල ලබා සිටින වඩු කාර්මිකයාව සොයා ගෙන තිබේ.
කෙසේවෙතත් ඝාතකයන් හෝ ඝාතනය සිදුකිරීමට හේතුව මෙතෙක් අනාවරණ වී නොමැත.
එමෙන්ම ඝාතකයා කිසිවක් කොල්ලකා නොමැති බවට ද වාර්තා වෙයි.
ප්රදේශයේ සීසීටීවී දර්ශන පරීක්ෂා කළ පොලීසියට කිසිඳු සැකසහිත පුද්ගලයෙකු හෝ කණ්ඩායමක් හඳුනාගැනීමට ද මෙතෙක් හැකි වී නොමැත.