මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතාගේ අස්සනින් යුතුව තමන් වෙත ලැබී ඇති චෝදනා පත්‍රය සම්බන්ධයෙන් පිළිතුරු ලිපියක් මුදල් අමාත්‍යාංශය වෙත යොමු කළ බව මහජන උපයෝගීතා කොමිසමේ සභාපති ජනක රත්නායක මහතා පවසයි.
ඊයේ (28) ප්‍රවෘත්ති සාකච්ඡාවක් පවත්වමින් ඔහු වැඩිදුරටත් සඳහන් කළේ, තමාට එල්ලවී ඇති චෝදනා තරයේ ප්‍රතික්ෂේප කරන බවය.
මහජන උපයෝගිතා කොමිසම සභාපති ජනක රත්නායක මහතා,
“විදුලිබල හා බලශක්ති අමාත්‍යවරයා විසින් අවුරුද්දක් තිස්සේ කියනවා මාව ඉවත් කිරීම සඳහා චෝදනා පත්‍රයක් එවනවා කියලා. මේ ඒ චෝදනා පත්‍රය පසුගිය සතියේ බදාදා ලැබුණා. මුදල් ඇමති ලෙස ජනාධිපතිවරයාගේ අස්සනින්. මේ චෝදනා පත්‍රයට පිළිතුරු දීමට සතියක කාලයක් ලබා දීලා තියෙනවා. ඒ කාලය හෙටින් අවසන් වෙනවා. ඒ සඳහා අද මම ඊට පිළිතුරු ලිපියක් යොමුකළා. එහි චෝදනා 05 ක් තියෙනවා. මම මේ චෝදනාවලට බය නැහැ. මම මේ චෝදනා එනතුරු බලන් හිටියේ මේ චෝදනාවලට මම උත්තර දීලා තියෙනවා. පාර්ලිමේන්තුවේ ඡන්දයෙන් මාව ඉවත් කරන්න පුළුවන්. අවසන් දවස දක්වා මගේ ක්‍රමයට මේ ආයතනයට වැඩ කරනවා කියන එක කාටවත් නවත්තන්ට බැහැ. දැන් කොමිසම නැත්තටම නැති කරලා තියෙන්නේ.”
ප්‍රශ්න – කවුද මේක පිටිපස්සේ ඉන්නේ ?
“විදුලිබල හා බලශක්ති ඇමතිවරයා, අවුරුද්දක් තිස්සේ ඉඳන් කියන්නේ චෝදනා 25ක් තියෙනවා කිව්වා, 15ක් කිව්වා. නමුත් අන්තිමට 05ක් එව්වා ඒ ඔක්කොම දැන් පුස්සක් වෙලා. මම උත්තර බඳින්නේ මහජනතාවට. මට අවශ්‍ය ජනතාවගෙන් නියෝගයක්, අධිකරණයෙන් හෝ දේශපාලනයෙන් තීන්දු එපා.”