ඩුබායි හි ගෘහ සේවයට යවන මුවාවෙන් මෙරට කාන්තාවන් සිරියාවේ රැකියා සඳහා හොර රහසේ පිටත් කර යවන කූඨ මිනිස් ජාවාරමක් පිළිබඳ තොරතුරු මහනුවර සාමදාන ආයතනය විසින් හෙළි කරගෙන තිබේ.
එම ජාවාරමට හසුවී නැවත මෙරටට පැමිණි කාන්තාවන් පිරිසක් මහනුවරදී මාධ්ය හමුවක් පවත්වමින් එම රටවල දී තමන්ට සිදුවූ හිරිහැර සම්බන්ධයෙන් මෙලෙස අනාවරණ කළහ.
ඒ අනුව මේ මිනිස් ජාවාරම්කරුවෝ දිවයින පුරා දුගී පවුල්වල කාන්තාවන් හා තරුණියන් හට ඩුබායි හි රැකියා ලබාදෙන මුවාවෙන් ගුවන් ගමන් බලපත්ර ඇතුළු සියලු ලියකියවිලි වංචනිකව සාදා සිරියාවට යවන බව අනාවරණය වී තිබේ.
මේ වන විට ශ්රී ලංකාවේ කතුන් 100කට ආසන්න පිරිසක් සිරියාවේ දහදුක් විඳිමින් සිටින බවත් වෙනත් රටවල්වල කාන්තාවන්ද දහස් ගණනක් මේ ජාවාරමට හසුව සිරියාවේ රැඳී සිටින බවත් එම කාන්තාවන් පවසයි.
එම කාන්තාවන් පවසන්නේ දෛනිකව පැය 22ක් පමණ තමන්ගෙන් සේවය ලබා ගන්නා අතර මාස කිහිපයක් යනතුරුත් වැටුපක් නොගෙවූ බවය.
එලෙස හිරිහැරයට ලක්වු කාන්තාවක්,
“ඒ ඒජන්සිය තියෙන්නේ මරදානේ. 11 මාසේ 13 මට සිරියාවට යන්න ටිකට් එක තියෙනවා කිව්වා. මම කිව්වා එහෙම රටක් දන්නේ නෑ කියලා. එහෙ ගිහින් මම වැඩ කරා. එහෙ ගිහින් වැඩකරද්දි මාස තුනකින් පඩි ගෙවන්න බෑ කිව්වා. මම කිව්වා ගෙදරට සල්ලි යවන්න ඕනේ කියලා. එහෙම කිව්වහම ඒ මනුස්සයා මට පයින් ගැහුවා. කනටත් ගැහුවා. ගහලා සයිලන්සර් එකෙන් මගේ අත පිච්චුවා. මට කිව්වා ඔයා ගැහුවා කිව්වොත් අපි පොලීසියට භාරදෙනවා කිව්වා ගෙදර බඩු හොරකම් කරා කියලා. අත බයික් එකේ සයිලන්සර් එකට පිච්චුවා. පිට පිච්චුවා කොණ්ඩ අයන් කරන මැෂිමෙන්. අත කැඩිලා තියෙන්නේ. ගැහුවා කියලා කියන්න එපා කිව්වා. මාත් එක්ක ගිය ළමයි 50ක් විතර ඉන්නවා. දෙමළ අය තමා ගොඩක් ම ඉන්නේ. අපි ගියදාම කිව්වා වැඩ කරේ නැත්නම් වෙඩි තියනවා කිව්වා….”