ජාත්යන්තර මූල්ය අරමුදල සමග එකඟතාවයට එළැඹි වහාම ඒ පිළිබඳ වාර්තාව පාර්ලිමේන්තුවට ඉදිරිපත් කරන බව ජනාධිපති රනිල් වික්රමසිංහ මහතා පවසයි.
ඒ අනුව, එය සම්මත කිරීමට හෝ ප්රතික්ෂේප කිරීමට ඕනෑම අයෙකුට අවස්ථාව ඇති බවත් පැවසූ ජනාධිපතිවරයා යම් පාර්ශ්වයක් එය ප්රතික්ෂේප කරන්නේ නම් ඔවුන් ජාත්යන්තර මූල්ය අරමුදලට විකල්ප යෝජනා ඉදිරිපත් කළ යුතු බවද පැවසීය.
ජනාධිපති රනිල් වික්රමසිංහ මහතා මේ බව සඳහන් කළේ ඊයේ (21) පස්වරුවේ කොළඹ කිංස්බරි හෝටලයේදී පැවති “2023 බදු සමුළුව” ආරම්භක දේශනය සිදු කරමිනි.
තවද මෙරට ප්රධාන ණයහිමියන් වන පැරිස් සමාජය, ඉන්දියාව සහ චීනය සමග වන ණය ප්රතිව්යුහගත කිරීමේ ක්රියාවලිය පිළිබඳ අදහස් දක්වමින් ජනාධිපතිවරයා සඳහන් කළේ, ශ්රී ලංකාව වෙනුවෙන් තම මූල්ය සහාය දැක්වීමට මේ වනවිට පැරිස් සමාජය සහතික වී ඇති බවය.
මෙහිදී ඉන්දියාව ද තමන්ටම ආවේණික ක්රමවේදයක් අනුගමනය කළ නමුත් චීනය තම ක්රමවේදය පිළිබඳව මෙතෙක් එකඟතාව පළකර නොමැති බවද ජනාධිපතිවරයා පැවසීය.
කෙසේ වුවද එළඹෙන 23 වනදා ඉන්දියාවේ බැංගලෝර් නගරයේ දී පැවැත්වෙන ජී- 20 රටවල මුදල් ඇමතිවරුන්ගේ සාකච්ඡාවේ දී ඔවුන්ගේ ස්ථාවරත්වය දැනුම් දෙනු ඇති බව ජනාධිපති රනිල් වික්රමසිංහ මහතා සඳහන් කළේය.
මේ අතර වත්මන් බදු ප්රතිපත්තිය, සාමාන්ය බදු ප්රතිපත්තියක් නොව, ගලවා ගැනීමේ මෙහෙයුමක් බවත් මෙම ක්රියාවලිය කඩාකප්පල් වුවහොත් ජාත්යන්තර මූල්ය අරමුදල සමග වැඩසටහනට ඇතුළත්වීමට නොහැකි වෙනවා සේම ශ්රී ලංකාවට කිසිඳු විදෙස් රටක් සමග ගනුදෙනු කිරීමට අවස්ථාව නොලැබෙන බවත් ජනාධිපති රනිල් වික්රමසිංහ මහතා පැවසීය.
2023 වසර සඳහා ඉදිරිපත් කළ අය වැය ද සාමාන්ය අය වැයක් නොව, වැටී ඇති ආර්ථිකය ගොඩනැංවීමේ මෙහෙයුමක් බව ජනාධිපතිවරයා සඳහන් කළේය.
ජාත්යන්තර මූල්ය අරමුදල වෙත යෝජනා ඉදිරිපත් කර තිබුණේ ශ්රී ලංකා වාණිජ මණ්ඩලය පමණක් බව මෙහිදී පැවසූ ජනාධිපතිවරයා ඒ හැර වෙනත් කිසිදු ආයතනයක්, පක්ෂයක් හෝ පුද්ගලයෙක් ජාත්යන්තර මූල්ය අරමුදල වෙත යෝජනා හෝ විකල්ප ඉදිරිපත් නොකළ බව සඳහන් කළේය.