පලාත් පාලන ඡන්ද විමසීමට පවතින බාධා සම්බන්ධයෙන් විශේෂ අවධානයක් යොමු කර ඇති බව මැතිවරණ කොමිසමේ සභාපති නිමල් ජී. පුංචිහේවා මහතා පවසයි.
මැතිවරණයට අදාළ බාධා කිරීම් සම්බන්ධ සිද්ධීන් 20 කට ආසන්න සංඛ්‍යාවක් මේ වන විට කොමිසමට ලැබී තිබේ.
දේශපාලන අධිකාරියෙන් මෙන්ම ඇතැම් සංවිධාන වලින් ද මෙම බලපෑම් එල්ලවී ඇති බව එම කොමිසම සඳහන් කළේය.
දිස්ත්‍රික් සහ සහකාර මැතිවරණ කොමසාරිස්වරුන්, මැතිවරණ කොමිසමේ නියෝජිතයන් අතර ඊයේ (11) පැවති සාකච්ඡාවේදී ද මේ සම්බන්ධයෙන් අවධානය යොමුව ඇත.
මේ අතර දේශපාලන පක්ෂ ලේකම්වරු සහ මැතිවරණ කොමිසමේ නිලධාරීන් අතර සාකච්ඡාවක් එළඹෙන අඟහරුවාදා දිනයේ පැවැත්වීමට සැලසුම් කර ඇති බව වාර්තා වේ.
එදින උදෑසන 10ට මෙම සාකච්ඡාව ආරම්භ වීමට නියමිතය.
නාමයෝජනා භාරදීමෙන් අනතුරුව දේශපාලන පක්ෂ නියෝජිතයින් මැතිවරණ නිලධාරීන් හමුවන දෙවන අවස්ථාව මෙය වේ.
මේ අතර පැෆ්රල් සංවිධානයේ විධායක අධ්‍යක්ෂ රෝහණ හෙට්ට්ආරච්චි මහතා සඳහන් කළේ මේ දක්වා මැතිවරණ ක්‍රියාවලිය සාමාන්‍ය මට්ටමක සිදුකෙරුනද මැතිවරණ නීතිරීති කඩ කිරීම් සම්බන්ධයෙන් පැමිණිලි 80ක් පමණ ලැබී ඇති බවය.