දිවයිනේ ඇතැම් ප්‍රදේශවල වී වගාවට වැළදී ඇති මූල ගැටිති වටපණු රෝගය හෙවත් නෙමටෝඩා රෝගය වැළදීමට හේතුව කාබනික ගොවිතැන සඳහා යොදාගත් ප්‍රමිතියෙන් තොර කාබනික පොහොර භාවිතයදැයි පිළිබඳ කෘෂිකර්ම දෙපාර්තමේන්තුවේ අවධානයට යොමු වී තිබෙනවා.
කෘෂිකර්ම අමාත්‍යංශයේ ලේකම් ගුණදාස සමරසිංහ අමාත්‍ය මහින්ද අමරවීර වෙත ඒ බව ප්‍රකාශ කළ බවයි කෘෂිකර්ම අමාත්‍යංශය පැවසුවේ.
2021 මහ කන්නයේදී රසායනික පොහොර තහනම් කිරීමෙන් අනතුරුව කාබනික පොහොර විවිධ ආයතන මඟින් ගොවිජනතාව වෙත බෙදා හරිනු ලැබුවා. නිසි ප්‍රමිතියෙන් යුත් කාබනික පොහොර එම ආයතනය විසින් සකස් කළේද යන්න පිළිබඳ සැකයක් පවතින බැවින් ඒ පිළිබඳ අවධානය යොමු කළ බවයි කෘෂිකර්ම දෙපාර්තමේන්තුව පැවසුවේ.
දැනට පරික්ෂා කර ඇති කොම්පෝස්ට් සාම්පලවල නෙමටෝඩා බහුල වශයෙන් පවතින බව මේවනවිටත් තහවුරු වී තිබෙනවා.
එහෙත් ඒ සම්බන්ධයෙන් තවදුරටත් පරීක්ෂණ පවත්වන බවයි කෘෂිකර්ම දෙපාර්තමේන්තුව සඳහන් කළේ. එමෙන්ම මෙම රෝගය මර්දනය සඳහා ගන්නා ක්‍රියාමාර්ගය සම්බන්ධව කෘෂිකර්ම දෙපාර්තමේන්තුව ගොවිජනතාව දැනුවත් කිරීමේ වැඩපිළිවෙළක් මේවනවිටත් ආරම්භ කර ඇති බවද කෘෂිකර්ම අමාත්‍යංශයේ ලේකම් ගුණදාස සමරසිංහ වැඩිදුරටත් පැවසුවා.