වර්තමාන ආර්ථික අර්බුදය හමුවේ ඉදිකිරීම් ක්ෂේත්‍රය මුහුණපා ඇති ගැටලු පිළිබඳව විශේෂ සාකච්ඡාවක් පවත්වා තිබේ.
ඒ, ආර්ථිකය ස්ථායීකරණයට අදාළ කෙටි සහ මධ්‍ය කාලීන වැඩසටහන් හඳුනාගැනීම සඳහා වන ජාතික සභා අනු කාරක සභාවේදීය.
එම අනු කාරක සභාව එහි සභාපති පාර්ලිමේන්තු මන්ත්‍රී පාඨලී චම්පික රණවක මහතාගේ ප්‍රධානත්වයෙන් ඊයේ (11) පාර්ලිමේන්තුවේදී රැස්විය.
මෙම කාරක සභාව සඳහා මෙරට ඉදිකිරීම් ක්ෂේත්‍රය හා සම්බන්ධ රාජ්‍ය හා පෞද්ගලික අංශ නියෝජනය කරන පාර්ශ්ව කිහිපයකම නියෝජිතයින් සහභාගී වූ අතර මේ වනවිට එම ක්ෂේත්‍රයේ පවතින ගැටලු පිළිබඳ ඒ ඒ පාර්ශ්වවල අදහස් ලබාගැනීම සිදුවී තිබේ.
මෙහිදී පැමිණ සිටි නියෝජිතයින් පෙන්වා දුන්නේ ඉදිකිරීම් ක්ෂේත්‍රය හා සම්බන්ධ සෘජු රැකියාවල නියුතුවන්නන් 650,000 ක් පමණ හා වක්‍ර රැකියාවල නියුතුවන්නන් ආසන්න වශයෙන් 700,000 ක් පමණ සිටින බවය.
නමුත් වර්තමානය වනවිට ඉදිකිරීම් ක්ෂේත්‍රය කඩා වැටීමකට ලක්වී ඇති බවත් මේ නිසා මෙම රැකියාලාභීන් අර්බුදයකට මුහුණපා ඇති බවත් ඔවුහු පෙන්වාදී ඇත.
එසේම දැනට ඉදිකොට ඇති මහල් නිවාස සහ කාර්යාල වැනි ඉදිකිරීම් අලෙවි කරගැනීමට අපහසු තත්ත්වයක් ඇතිවී තිබෙන බවද මෙම පාර්ශ්ව පවසයි.
මේ වනවිට ඉදිකොට ඇති ඉදිකිරීම්වලින් කොටසක් සඳහා රජය විසින් ගෙවීම් සිදු නොකිරීම හේතුවෙන් බැංකු ණය ගෙවාගැනීමට අපහසුවූ විශාල පිරිසක් සිටින බවද පැමිණ සිටි පාර්ශ්ව පෙන්වාදී තිබේ.
එසේම ආර්ථික අර්බුදය හේතුවෙන් ඉදිකිරීම් ක්ෂේත්‍රය හා සම්බන්ධ පුද්ගලයින් රට හැරයාමේ ප්‍රවණතාවක් ඇතිවී තිබෙන බවද මෙහිදී අනාවරණය විය.
අනු කාරක සභාවේ සභාපති පාර්ලිමේන්තු මන්ත්‍රී පාඨලී චම්පික රණවක මහතා සඳහන් කළේ, මෙම ගැටලු සඳහා මුදල් අවශ්‍ය වන විසදුම්, මුදල් අවශ්‍ය නොවන විසදුම් සහ නීතිමය විසදුම් වෙන වෙනම හඳුනාගෙන වෙන වෙනම ක්‍රියාත්මක නොවුනහොත් රටේ ඉංජිනේරැ ක්ෂේත්‍රය විශාල බිඳ වැටීමකට ලක්වන බවය.
මේ නිසා කඩිනමින් මේ පිළිබඳ වූ යෝජනාවන් පාර්ලිමේන්තුවට සහ රජයට ඉදිරිපත්කිරීමට බලාපොරෝත්තු වන බවද ඔහු පැවසීය.