අරණායක – මාවනැල්ල මාර්ගයේ අලුපත ප්‍රදේශයේ දී සිදු වු රිය අනතුරකින් අරණායක පොලිස්ථානයට අනුයුක්තව සේවය කළ පොලිස් කොස්තාපල්වරයෙකු මියගොස් තිබේ.
ඔහු ඊයේ (09) සවස යතුරුපැදියකින් ගමන්කරමින් සිටියදී මෙලස අනතුරට ලක්ව බරපතළ තුවාල ලබා දිප්පිටිය රෝහලට ඇතුළත් කර වැඩිදුර ප්‍රතිකාර සඳහා මහනුවර රෝහලට ඇතුළත් කිරීමේ දී මියගොස් ඇති බව පොලිස් මාධ්‍ය ප්‍රකාශක කාර්යාලය පවසයි.
මිය ගොස් ඇත්තේ අවුරුදු 22ක් වයසැති අග්බෝපුර, කන්තාලේ ප්‍රදේශයේ පදිංචිව සිටි අයෙකි.
මෙම නිලධාරියා අරණායක ප්‍රදේශයේ පැවති සංදර්ශන උත්සව අවස්ථාවක රාජකාරියේ යෙදී සිටින අතරතුර මෙලෙස අනතුරට පත්ව ඇති බව අනාවරණය වී ඇත.
අනතුර සම්බන්ධයෙන් අරණායක පොලීසිය වැඩිදුර විමර්ශන පවත්වයි.