දෙස් විදෙස් බෞද්ධ බැතිමතුන් අතර ඉමහත් ප්රසිද්ධියක් උසුලන මහනුවර, හන්තාන සඳගිරි සෑ චෛත්ය රාජයාණන් වහන්සේ ගර්භය වෙත පිවිසෙන දොරටු ද්විත්වය බිඳ ගර්භ බුද්ධ මන්දිරයේ තැන්පත් කර තිබූ රන්මාල, මැණික් ඇතුළු පූජා භාණ්ඩ කිසියම් පිරිසක් විසින් සොරකම් කර තිබේ.
සඳගිරි සෑය විහාරාධිපති පූජ්ය ගඟසිරිපුර ධම්මාලෝක හිමි සඳහන් කරනුයේ මෙම සිදුවීම පිළිබඳව තමන්වහන්සේ අද (23) උදෑසන දැනගත් වහාම පොලීසිය ඇතුළු ආරක්ෂක අංශ දැනුවත් කිරීමට පියවර ගත් බවය.
සිද්ධිය සම්බන්ධයෙන් වැඩිදුරටත් අදහස් දැක්වූ විහාරාධිපති පූජ්ය ගඟසිරිපුර ධම්මාලෝක හිමි,
“උදේ චෛත්ය බලන්න ගිය අය දැනුවත් කළේ දොර කඩලා කියන එක අපිට ලොකු සැකයක් තිබුණේ දොර කැඩුවානම් අනිවාර්යයෙන්ම ඇතුළේ තියෙන ප්රධාන රන් කරඬුව, සහ මට ගොඩක්ම බය තිබුණේ සඳගිරි සෑයේ තැන්පත් කරලා තිබුණ සර්වඥ ධාතූන්වහන්සේ ගැන. ආරක්ෂක අංශයේ නිලධාරීන් එක්ක අපි ගිහින් බලනකොට ඇතුළ් වෙන ප්රධාන දොරටු තුනේ ලොක් තුනක් තියෙනවා ඒ ටික සම්පූර්ණයෙන් කඩලා ඇතුල් වෙලා තියෙන්නේ. ඒ අයට වටිනා කියන දේවල් මග හැරිලා තියෙනවා… ආපු පිරිස විසින් අරගෙන ගිහින් තියෙන්නේ ධාතු කරඬුව ඇතුළේ රට වටින් වන්දනා කරන්න පැමිණි සැදැහැවතුන් විටින් විට පූජා කරපු වටිනා ද්රව්ය තිබුණා. මැණික් ගල් කිහිපයක් තිබුණා ඒවා අරගෙන ගිහින් තිබුණා. ඒ වගේම ධාතු නිදානොත්සවයෙන් අනතුරුව සැදැහැවතුන් අරගෙන ආපු රන් මාල 10-12ක් ප්රමාණයක් පලන්ඳලා තිබුණා. ඒවා තමයි පැහැරගෙන ගිහින් තිබුණේ”