උත්සව සමය නිමිත්තෙන් දිවයින පුරා පැවැත්වීමට නියමිත සංගීත ප්‍රසංග (Musical Shows) සම්බන්ධයෙන්, ප්‍රසංග පැවැත්වීමට දැඩි නීති මෙන්ම අවසර දෙන වේලාවන් පිළිබඳ පොලිස් මාධ්‍ය ප්‍රකාශක සහකාර පොලිස් අධිකාරී නීතිඥ ෆෙඩ්රික් වුට්ලර් මහතා විශේෂ දැනුම්දීමක් සිදුකර ති‍බෙනවා.
උත්සව සමයේ සෑම පොලිස් බල ප්‍රදේශයකම පාහේ සංගීත ප්‍රසංග පැවැත්වීමට විශාල ඉල්ලුම්පත් ප්‍රමාණයක් ලැබෙමින් පවතින බව ඔහු සඳහන් කළේය. මේ ඉල්ලුම්පත් සලකා බලා ඒ සඳහා අවශ්‍ය අවසරය ලබාදීම සහ නියාමනය කිරීම අදාළ මූලස්ථාන පොලිස් පරීක්ෂකවරුන් හෝ ස්ථානාධිපතිවරුන් විසින් සිදු කරනු ලබයි.
මේ සංගීත ප්‍රසංග ඉතාමත් ගෞරවනීය ලෙස අවසානය දක්වා පවත්වාගෙන යෑමට නම් සංවිධායක මණ්ඩලයේ පූර්ණ සහයෝගය පොලිසියට අවශ්‍ය බව වුට්ලර් මහතා අවධාරණය කළේය. ප්‍රසංග භූමියේ සාමය සහ ආරක්ෂාව තහවුරු කිරීමට සංවිධායක මණ්ඩලය විසින් තෝරාගත් නියෝජිතයන් පත් කරමින් ඔවුන් ද ඒ සඳහා කැපවිය යුතු බව ඔහු පැවසීය.
ශ්‍රේෂ්ඨාධිකරණ නියෝගයන්ට අනුකූලව සංගීත ප්‍රසංග පවත්වාගෙන යා යුතු කාලසීමාව පිළිබඳව පොලිස් මාධ්‍ය ප්‍රකාශකවරයා මෙහිදී කරුණු පැහැදිලි කළේය.
සඳුදා, අඟහරුවාදා, බදාදා සහ බ්‍රහස්පතින්දා උදෑසන 6.00 සිට රාත්‍රී 10.00 දක්වා පමණි.
සිකුරාදා සහ සෙනසුරාදා අලුයම 1.00 දක්වා පැවැත්වීමට අවසර හිමි වේ.
ඉරිදා මධ්‍යම රාත්‍රී 12.30 දක්වා පමණක් පැවැත්විය හැකිය.
අදාළ නීති රීති සහ කොන්දේසිවලට අනුගත වෙමින්, මහජන පීඩාවක් නොවන පරිදි ඉතාමත් සාමකාමී අයුරින් මේ උත්සව අවසන් කර ගැනීමට කටයුතු කරන ලෙස පොලිස් මාධ්‍ය ප්‍රකාශකවරයා සංවිධායක මණ්ඩලවලින් ඉල්ලා සිටියි.