මේ වන විට ශ්රී ලංකා රේගුව විසින් රඳවාගෙන සිටින BYD වාහනවල මෝටර් ධාරිතාව සම්බන්ධයෙන් සිදු කරන විමර්ශන කටයුතු කඩිනමින් අවසන් කරන ලෙස අභියාචනාධිකරණය අද (24) රේගුවට නියම කළේය.
රේගුව විසින් ජාතික ආර්ථිකයට බදු මුදල් රැස්කර දීම ඉතා වැදගත් වනවා සේම වාහනවල ගැණුම්කරුවන්ගේ මෙන්ම ආනයනික සමාගම්වල යහපත සම්බන්ධයෙන්ද අධිකරණයට සලකා බැලීමට සිදුවන බව අභියාචනාධිකරණ සභාපති විනිසුරු රොහන්ත අබේසූරිය මහතා විවෘත අධිකරණයේ ප්රකාශ කළේය.
මේ හේතුවෙන් මෙම විමර්ශන කඩිනමින් අවසන් කළ යුතු බවත් ඒ සඳහා සහාය ලබාදෙන ලෙස පෙත්සම්කර පාර්ශවයටත් විනිසුරුවරයා දැනුම් දුන්නේය.
රේගුව විසින් විසින් රඳවාගෙන සිටින සිය වාහන නිදහස් කිරීමේ නියෝගයක් නිකුත් කරන ලෙස ඉල්ලා ජෝන් කීල්ස් සීජී සමාගම විසින් ඉදිරිපත් කළ පෙත්සම කැඳවූ අවස්ථාවේදී විනිසුරුවරයා මේ බව ප්රකාශ කළේය.
මෙම පෙත්සම අද කැඳවූ අවස්ථාවේදී ශ්රී ලංකා රේගුව වෙනුවෙන් පෙනී සිටි අතිරේක සොලිසිටර් ජෙනරාල් සුමති ධර්මවර්ධන මහතා අධිකරණය හමුවේ කරුණු දක්වමින් මේ වනවිට රඳවාගෙන සිටින වාහන සමාගම් ඇපකරයක් මත කොන්දේසිවලට යටත්ව මුදා හැරීමට හැකියාව තිබෙන බව සඳහන් කළේය.
මෙම විමර්ශන සඳහා පෙත්සම්සකාර සමාගම සහාය ලබාදිය යුතු බවත් අතිරේක සොලිසිටර් ජනරාල්වරයා අවධාරණය කළේය.
පෙත්සම්කාර සමාගම විසින් මෙරටට ගෙන්වා තිබෙන වාහන පරීක්ෂණ ස්කෑන් යන්ත්ර පිළිබඳ වාර්තාවක් ලබන සඳුදා මෝසමක් මාර්ගයෙන් අධිකරණයට දැනුම් දෙන බවත් අතිරේක සොලිසිටර් ජෙනරාල්වරයා පැවසීය.
කෙසේ වෙතත් පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ ෆර්සානා ජමිල් මහත්මිය අධිකරණය හමුවේ කරුණු දක්වමින් රේගුව විසින් මෙම වාහන රඳවාගෙන තිබෙන ආකාරය නීතියට පටහැනි බව පෙන්වා දුන්නේය.
කෙසේ වෙතත් පෙත්සම්කාර පාර්ශ්වය සහ වගඋත්තරකාර පාර්ශ්වය අතර දීර්ඝ ලෙස කරුණු ඉදිරිපත් කෙරුණත් මෙම වාහන ඇපකරයක් මත මුදා හැරීම සම්බන්ධයෙන් එකඟතාවයක් ඇති නොවීය.
ඒ අනුව මෙම නඩුකරය සමථයට පත් කිරීමට තිබෙන හැකියාව පිළිබඳව
ලබන 28 වනදා දැනුම් දෙන බවත් අතිරේක සොලිසිටර් ජෙනරාල්වරයා අධිකරණය හමුවේ ප්රකාශ කළේය.