සුනඛ සපාකෑම් ලක්ෂ 3කට ආසන්න සංඛ්යාවක් වර්ෂිකව සිදුවන බව මහජන සෞඛ්ය පශු වෛද්ය සේවාව පවසයි.
මේ හේතුවෙන් පසුගිය වසරේ පමණක් මානව ජලභීතිකා එන්නත් ලක්ෂ දෙකට ආසන්න ප්රමාණයක් භාවිතා කර තිබේ.
මහජන සෞඛ්ය පශු වෛද්ය සේවාවේ වෛද්ය නිළධාරී වෛද්ය යේෂාන් ගුරුගේ මහතා පවසා සිටියේ, පසුගිය වසරේ ජලභීතිකා රෝගය හේතුවෙන් පුද්ගලයින් 20 දෙනෙකු මියගොස් ඇති බවයි.
එම මියගිය පිරිසෙන් 11ක් සුනඛ සපාකෑම් නිසාය.
කෙසේ නමුත් තවත් අයෙකු මියගොස් ඇත්තේ කලවැද්දෙක් සපාකෑමෙන් බවද හඳුනාගෙන ඇත.
එමෙන්ම ඉතිරි මරණ 8හි පැහැදිළිවම සතා හඳුනගෙන නොමැත.
මෙලෙස සත්ත්ව සපාකෑම්වලට වැඩි වශයෙන් ගොදුරුවන්නේ මැදි වයස් පුද්ගලයන්වන අතර, ඔවුන්ගෙන් 2ට 1ක් පිරිමි පුද්ගලයන්ය.
සුනඛ සපාකෑම් වැඩි වශයෙන් වාර්තා වුවත්, පසුගිය වසර දහයක කාලය තුළ එය ක්රමයෙන් අඩුවී ඇත. කෙසේ නමුත් රිළවු සපාකෑම් වැඩි වී ඇත.
මෙහිදී වෛද්ය යේෂාන් ගුරුගේ මහතා පවසා සිටියේ, මානව ජලභීතිකා එන්නත් සඳහා වාර්ෂිකව රුපියල් මිලියන 600කට අධික මුදලක් වැය කරන බවයි.