අභාවප්‍රාප්ත හිටපු විපක්ෂ නායකවරයෙකු මෙන්ම දෙමළ ජාතික සන්ධානයේ නායක පාර්ලිමේන්තු මන්ත්‍රී ආර්. සම්පන්දන් මහතාගේ දේහය බොරැල්ලේ පිහිටි පෞද්ගලික මල්ශාලාවක් වෙත අද (01) උදෑසන රැගෙන ගියේය.
කලක් රෝගාතුරව සිටි ඒ මහතා කොළඹ පෞද්ගලික රෝහලක ප්‍රතිකාර ලබමින් සිටියදී ඊයේ (30) රාත්‍රියේ අභාවප්‍රාප්ත විය.
මියයන විට ඒ මහතා 91 වැනි වියේ පසුවිය.
1933 පෙබරවාරි මස 05 වැනිදා උපත ලද රාජවරෝදියම් සම්පන්දන් මහතාව කවුරුත් හඳුනාගෙන සිටියේ ආර්. සම්පන්දන් ලෙසය.
යාපනය ශාන්ත පැට්‍රික් විද්‍යාලයෙන් මූලික අධ්‍යාපනය හැදෑරූ ඔහු තවත් පාසල් කිහිපයකින්ම අධ්‍යාපනය හදාරා තිබුණි.
වෘත්තියෙන් නීතීඥවරයකු වූ ඒ මහතා දෙමළ එක්සත් විමුක්ති පෙරමුණ නියෝජනය කරමින් 1977 වසරේ පැවති මහ මැතිවරණයෙන් ත්‍රිකුණාමලය දිස්ත්‍රික්කය නියෝජනය කරමින් පළමුවරට පාර්ලිමේන්තු වරම් දිනාගත්තේය.
ඒ අනුව 1977 සිට 1983 දක්වාත් , 1997 සිට 2000 දක්වාත් , 2001 සිට මියෙනතුරුත් ඔහු පාර්ලිමේන්තු මන්ත්‍රීවරයෙකු ලෙස කටයුතු කළේය.
යහපාලන ආණ්ඩුව පැවති සමයේ වසර 3ක කාලයක් ආර්. සම්පන්දන් මහතා මෙරට පාර්ලිමේන්තුවේ 14 වැනි විපක්ෂ නායකවරයා ලෙසද පත්ව සිටියේය.
දෙමළ ජනතාවගේ අයිතිවාසිකම් වෙනුවෙන් නිරන්තරයෙන් සිය හඬ අවදි කළ ආර්. සම්පන්දන් මහතා මෙරට දෙමළ දේශපාලන ව්‍යාපාරය තුළ කේන්ද්‍රීය සහ තීරණාත්මක සාධකයක් විය.
මේ අතර ආර්. සම්පන්දන් මහතාගේ අභාවය සම්බන්ධයෙන් විපක්ෂ නායක සජිත් ප්‍රේමදාස මහතා x සටහනක් තබමින් ශෝකය ප්‍රකාශ කර තිබේ.
එමඟින් දැක්වෙන්නේ, අඩසියවසකට වැඩි කලක් ශ්‍රී ලාංකිකයන් වෙනුවෙන් සේවය කළ ආර්. සම්පන්දන් මහතා සියලුම ශ්‍රී ලංකිකයන්ට සම අයිතිය ලබාගැනීම සඳහා බලාපොරොත්තුවේ ප්‍රදීපයක් වූ බවය.
එමෙන්ම සම්පන්දන් මහතාගේ අභාවය මෙරට දේශපාලන ක්ෂේත්‍රයට දැරිය නොහැකි පාඩුවක් බව හිටපු ජනාධිපති මහින්ද රාජපක්ෂ මහතාද සිය X අවකාශය ඔස්සේ ශෝක පණිවුඩයක් නිකුත් කරමින් සඳහන් කරයි.
සම්පන්දන් මහතාගේ අවමංගල්‍ය ය අවසන් කටයුතු සම්බන්ධයෙන් පාර්ලිමේන්තු මන්ත්‍රී එම්. ඒ සුමන්දිරන් මහතා කරුණු පැහැදිලි කළේය.
එහිදී ඔහු පැවසුවේ හෙට (02) දිනය පුරාම ආර්. සම්පන්දන් මහතාගේ දේහය බොරැල්ලේ පිහිටි පෞද්ගලික මල්ශාලාවක තැන්පත් කර තබා පසුව එළැඹෙන බදාදා (03) දිනයේ දී ගෞරව දැක්වීම සඳහා ඒ මහතාගේ දේහය පාර්ලිමේන්තුව වෙත ගෙන යන බවය.
පසුව එතුමාගේ දේහය ත්‍රිකුණාමලය වෙත ගෙන යන බවත් අවසන් කටයුතු සිදුකරන දිනය සම්බන්ධයෙන් අවසන් තීරණයක් ගෙන නොමැති නමුත් ඉරිදා (07) දිනයේ දී අවසන් කටයුතු සිදුකිරීමට බලාපොරොත්තු වන බව සුමන්දිරන් මහතා වැඩිදුරටත් පැවසීය.