රුසියානු යුක්රේන යුද ගැටුම් සඳහා මැදිව සිටින මෙරට විශ්රාමික යුද හමුදා සෙබළුන් කඩිනමින් දිවයිනට ගෙන්වා දෙන්නැයි ඉල්ලා ඔවුන්ගේ ඥාතීන් අද පෙරවරුවේ කොළඹ පිහිටි රුසියානු තානාපති කාර්යාලය ඉදිරිපිට නිහඬ විරෝධතාවයක නිරතවුණි.
මේ සඳහා පාර්ලිමේන්තු මන්ත්රීවරුන් වන ගාමිණි වලේබොඩ සහ දයාසිරි ජයසේකර යන මහත්වරුන්ද සහභාගී වී සිටියේය.
විරෝධතාවයේ නිරත පිරිස රුසියානු තානාපති කාර්යාලයට සංදේශයක් භාරදුන් අතර එහිදී ඔවුන්ගෙන් සිව්දෙනෙකුට රුසියානු තානාපතිවරයා සමග සාකච්ඡාවකට අවස්ථාව හිමිවුණි.
එහිදී අදහස් දැක්වූ ශ්රී ලංකාවේ රුසියානු තානාපති Levan S. Dzhagaryan,
“මට පැහැදිළියි ඇයි මේ ජනතාව රුසියානු තානාපති කාර්යාලය ඉදිරිපිටට ඇවිත් ඉන්න කාරණය මොකක්ද කියලා. මට කණගාටුයි මේ වනවිට සිදුවෙමින් පවතින දේ ගැන. ශ්රී ලංකාවේ රුසියානු තානාපති ලෙස මම පොරොන්දු වෙනවා මම මගේ උපරිමයෙන්ම කටයුතු කරනවා මේ ප්රශ්නය හැකි ඉක්මනින්ම සමථයකට පත්කර ශ්රී ලාංකික අපේ මිතුරන් යළි ගෙන්වා ගැනීමට. මම මගේ උපරිමයෙන්ම එය සිදුකරනවා.”
මේ අතර රුසියාවේ රැකියා ලබාදෙන බව පවසමින් පුද්ගලයින් 140කට අධික පිරිසකගෙන් මුදල් වංචා කළ පුද්ගලයින් තිදෙනෙක් මොරටුව පොලීසිය මගින් අත්අඩංගුවට ගෙන තිබේ.
එසේම රුසියාවේ යුද ගැටුම් සඳහා මැදිව සිටින ශ්රී ලාංකිකයින් පිළිබඳව සොයා බැලීමට ජනාධිපතිවරයා පත්කළ විදේශ කටයුතු රාජ්ය අමාත්ය තාරක බාලසූරිය මහතා ඇතුළු කමිටුව ජුනි 05 වැනිදා එරටට ගොස් අදාළ බලධාරීන් සමඟ සාකච්ඡා කිරීමට තීරණය කර ඇතැයි විදේශ කටයුතු අමාත්ය අලි සබ්රි මහතා මාධ්යට සඳහන් කළේය.