කළුතර අපරාධ කොට්ඨාශය විසින් හෙරොයින් තොගයක් සමග අත්අඩංගුවට ගත් සැකකරු පිළිබඳව මේ වනවිට තවත් තොරතුරු රැසක් හෙළිවී තිබේ.
වැඩිදුරටත් තොරතුරු අනාවරණය වී ඇත්තේ මෙලෙස අත්අඩංගුවට ගෙන ඇත්තේ “වලපල හාමු” නමැති අන්වර්ථ නාමයෙන් හඳුන්වන අයෙකු බවය.
එම සැකකරු ඩුබායි රාජ්‍යයේ සැඟව සිටින මත්ද්‍රව්‍ය ජාවාරම්කරුවෙකු වන “ඩුබායි තරංගගේ” ප්‍රධාන ගෝලයෙකු බවට තොරතුරු අනාවරණය වී ඇත.
පානදුර වලපල ප්‍රදේශයේ ක්‍රියාත්මක වන හෙරොයින් ජාවාරමක් සම්බන්ධයෙන් කළුතර අපරාධ කොට්ඨාසයේ ස්ථානාධිපති තිලංග සංජීව මහතාට ලද තොරතුරකට අනුව පොලීසිය විසින් මෙම වැටලීම ක්‍රියාත්මක කර තිබුණි.
එහිදී පානදුර වලපල ප්‍රදේශයේ ප්‍රධාන මාර්ගයක් අසළ රැඳී සිටි සැකකාර “වලපල හාමු” නමැති 37 හැවිරිදි වියේ පසුවන පුද්ගලයාව හෙරොයින් සමග අත්අඩංගුවට ගෙන තිබුණි.
ඔහු සන්තකයේ තිබී හෙරොයින් මත්ද්‍රව්‍ය කිලෝ 1යි ග්‍රෑම් 850ක් සොයාගෙන ඇති අතර එහි වටිනාකම රුපියල් කෝටි 5කට අධික බවද පොලීසිය වැඩිදුරටත් පවසයි.
අත්අඩංගුවට ගත් සැකකරුගෙන් සිදුකළ වැඩිදුර ප්‍රශ්න කිරීම්වලදී අනාවරණය වී ඇත්තේ ඔහු විසින් පානදුර, වාද්දුව, බණ්ඩාරගම සහ හොරණ ඇතුළු ප්‍රදේශ රැසක සිල්ලර වශයෙන් හෙරොයින් ජාවාරම සිදුකර ඇති බවය.
අත්අඩංගුවට ගත් සැකකාර “වලපල හාමු” නමැති පුද්ගලයා ද අධික ලෙස හෙරොයින් මත්ද්‍රව්‍ය භාවිතයට ඇබ්බැහි වී සිටින අයෙකු බවද අනාවරණය වී තිබේ.
එහිදී මෙම ජාවාරම සිදුකරගෙන යාම සඳහා සැකකරු භාවිත කළ ජංගම දුරකථනයද පොලීසිය සිය භාරයට ගෙන ඇත.
සැකකරු පානදුර මහෙස්ත්‍රාත් අධිකරණය වෙත ඉදිරිපත් කිරීමට නියමිතව තිබේ.