ප්‍රථමයෙන් ජනාධිපතිවරණයක් පැවැත්වෙන බවට ජනාධිපතිවරයා ඇතුළු පාර්ශව විවිධ ප්‍රකාශ සිදුකළ ද මහ මැතිවරණයක් ලබාගැනීමේ ශ්‍රී ලංකා පොදුජන පෙරමුණේ උත්සාහය මේ වන තෙක් අවසන්ව නොමැති බව දේශපාලන ආරංචි මාර්ග පවසයි.
පොදුජන පෙරමුණ නියෝජනය කරන බොහෝ මන්ත්‍රීවරුන් මාධ්‍ය හමුවලදී මෙන්ම දේශපාලන සාකච්ඡාවලදීද මහ මැතිවරණයක් පැවැත්වීම පිළිබඳ විවිධ අදහස් පළ කරයි.
ඒ අනුව සිංහල අලුත් අවුරුද්දෙන් පසුව කිසියම් දේශපාලන පෙරළියක් සිදුවනු ඇති බව දේශපාලන කේෂ්ත්‍රයේ කතාබහට ලක්ව ඇත.
කෙසේවෙතත් ශ්‍රී ලංකා පොදුජන පෙරමුණේ අමාත්‍යධුර දරන කණ්ඩායමක් ජනාධිපතිවරයා සමඟ එක්ව කටයුතු කළ යුතු බවට පසුගිය දා පැවැති විධායක සභාවේ දී ප්‍රකාශ කර තිබේ.
මෙම ප්‍රකාශයත් සමඟ දැනට අමාත්‍ය ධුර දරන කංචන විජේසේකර, ප්‍රසන්න රණතුංග, බන්දුල ගුණවර්ධන ප්‍රමිත බණ්ඩාර තෙන්නකෝන් ඇතුළු පිරිසක් ඉදිරියේ දී කණ්ඩායමක් ලෙස ජනාධිපතිවරයාට සහය පළ කිරීම සඳහා එක්වනු ඇති බව වාර්තා වේ.
මෙම තත්වය තුළ ශ්‍රී ලංකා පොදුජන පෙරමුණ තවදුරටත් අර්බුදකාරී තත්ත්වයකට පත්ව තිබේ.
මේ අතර එළඹෙන ජනාධිපතිවරණයේ දී ඡන්ද දායකයන් එක්කෝටි හැත්තෑ ලක්ෂයක් ඡන්දය භාවිත කිරීම සඳහා සුදුසුකම් ලබා ඇති බව සඳහන්ය.
2019 වර්ෂයේ දී අවසන් වරට පැවැති ජනාධිපතිවරණය සඳහා ඡන්ද දායකයින් එක් කෝටි හැට ලක්ෂයක් සුදුසුකම් ලබා තිබුණ ද මෙවර එම සංඛ්‍යාව ලක්ෂ 10කින් වැඩි වී තිබේ.
වයස අවුරුදු 18 සම්පුර්ණ වු ඡන්ද දායකයින් මෙලෙස සුදුසුකම් ලබා ඇති බව වාර්තා වේ.