අම්බලන්ගොඩ ගලගොඩ වෙළපාර ප්‍රදේශයේදී පසුගිය 11 වනදා රාත්‍රියේ සිදුකළ වෙඩිතැබීමේ සිද්ධියට අදාළව සැකපිට පුද්ගලයෙකු අත්අඩංගුවට ගෙන තිබේ.
මෙලෙස අත්අඩංගුවට ගෙන ඇති පුද්ගලයා සන්තකයේ තිබී හෙරොයින් ග්‍රෑම් 2යි මිලිග්‍රෑම් 100ක් ද පොලීසිය සොයාගෙන ඇත.
එසේම දුරකථන සිම්කාඩ් පත් 3ක් ජංගම දුරකතනයක් ද සැකකරු සන්තකයේ තිබී පොලිස් භාරයට ගෙන තිබේ.
පොලීසියට ලද තොරතුරකට අනුව සැකකරු මෙලෙස අත්අඩංගුවට ගෙන ඇත.
පොලීසිය පවසන්නේ වැඩිදුර විමර්ශනවලදී සැකකරු සමන් කොල්ලා නමැති අපරාධකරු සමග දුරකථන මාර්ගයෙන් සම්බන්ධ වී මෙම අපරාධය කිරීම සඳහා ආධාර අනුබල දී ඇති බවය.
සැකකරු බලපිටිය මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව දින 7ක රැඳවුම් නියෝග ලබාගෙන ඉදිරි විමර්ශන සිදුකිරීමට නියමිතය,
පසුගිය 11 වනදා රාත්‍රියේ ගලගොඩ වෙළපාර ප්‍රදේශයේදී වෙළෙඳසැලක් ඉදිරිපිටදී සිදුකළ වෙඩිතැබීමකින් එහි හිමිකරු සහ තවත් පුද්ගලයෙකු මියගොස් තිදෙනෙකු තුවාල ලැබීය.