කටාර් රාජ්‍යය සහ ශ්‍රී ලංකාව අතර ක්‍රියාත්මක මහා පරිමාණ මත්ද්‍රව්‍ය ජාවරමකට සම්බන්ධ ප්‍රධාන සැකකරුවෙකු අත්අඩංගුවට ගෙන තිබේ.
අළුබෝමුල්ල පොලීසිය සඳහන් කළේ “අළුබෝමුල්ලේ පිංකි” නමැත්තා ඇතුළු මත්ද්‍රව්‍ය ජාවාරමට සම්බන්ධ පුද්ගලයන් 04 දෙනෙකු එලෙස අත්අඩංගුවට ගත් බවය.
මෙසේ අත්අඩංගුවට ගෙන ඇත්තේ අළුබෝමුල්ල මහාබෙල්ලන, බණ්ඩාරගම, රඹුක්කන පදිංචි පුද්ගලයන් සිව්දෙනෙකි.
ප්‍රධාන සැකකරු කිසිදු රැකියාවක් නොමැතිව සුඛෝපභෝගී නිවසක් සහ සුඛෝපභෝගී මෝටර් රථ රැසක් භාවිත කරමින් සුපිරි ජීවිතයක් ගත කරන බවත් තෙමහල් ගොඩනැගිලි ඇතුළු දේපොළ රැසක හිමිකරුවෙකු බවට ලද තොරතුරු මත අළුබෝමුල්ල පොලීසියේ ස්ථානාධිපති පොලිස් පරීක්ෂක අසංක රාජකරුණා මහතාට සැකසිතී විමර්ශන ක්‍රියාත්මක කර තිබුණි.
ඒ අනුව සැකකරු පොලීසියට ගෙන්වා පැය 02ක පමණ කාලයක් ප්‍රශ්න කරමින් සිටියදී ඔහු සතු ජංගම දුරකථන පරීක්ෂා කිරීමටත් පියවර ගෙන තිබුණි.
ඒ අවස්ථාවේදී ඔහුගේ ජංගම දුරකථනයට කෙටි පණිවුඩ රාශියක් ලැබී ඇත.
ඔහුගේ ජංගම දුරකථනය පරීක්ෂා කිරීමේදී කටාර් රාජ්‍යයේ සහ මෙරට මත්කුඩු ජාවාරමට සම්බන්ධ මත්කුඩු ඡායාරූප, මුදල් ගනුදෙනු රිසිට් පත්, දුරකථන සංවාද, ගූගල් සිතියම් ඇතුළු තොරතුරු රැසක් අඩංගුව තිබූ බවද අනාවරණය වූ බව පොලීසිය පවසයි.
ඒ අනුව සැකකරුගෙන් දීර්ඝ ලෙස ප්‍රශ්න කිරීමේදී හෙළිවූ තොරතුරු මත ජාවාරමට සම්බන්ධ අනෙක් සැකකරුවන් අත්අඩංගුවට ගෙන ඇත.
සැකකරුවන්ගේ බැංකු ගිණුම් පරීක්ෂා කිරීමේදී වසරක පමණ කාලයකදී රුපියල් කෝටි 15 කට අධික මුදල් ගනුදෙනු කර ඇති බවටද අණාවරණය වී ඇති බව පොලිස් ආරංචි මාර්ග සඳහන් කරයි.
ඒ අනුව සැකකරුගේ බැංකු ගිණුම් අත්හිටුවා වැඩිදුර විමර්ශන සිදුකරන බව උසස් පොලිස් නිලධාරීයෙකු පැවසීය.
ප්‍රධාන සැකකරු සහ ඔහුගේ ප්‍රධාන ගෝලයා කටාර් රාජ්‍යයේ මත්කුඩු ජාවාරම් කොට සිරගත කර සිටි දෙදෙනෙකු බවද, ප්‍රධාන ගෝලයා එරටින් පිටුවහල් කර ඇති අයෙකු බවද හෙළිවී ඇත.
සැකකරුවන් සන්තකයේ තිබී හෙරොයින් මත්කුඩු ග්‍රෑම් 22ක්, සුඛෝපභෝගී මෝටර් රථයක්, ත්‍රීරෝද රථ දෙකක්, යතුරුපැදියක්, ජංගම දුරකථන සහ බැංකු ගිණුම් විමර්ශන නිලධාරීන් භාරයට ගෙන තිබේ.
සැකකරුවන් වැඩිදුර විමර්ශන සඳහා පොලිස් මත්ද්‍රව්‍ය නාශක කාර්යාංශය වෙත භාරදීමට නියමිතය.