සෞඛ්‍ය අමාත්‍යාංශය ඊයේ නිවේදනයක් නිකුත් කරමින් සඳහන් කළේ කුරුණෑගල රෝහලේ සීටී ස්කෑන් යන්ත්‍රය සඳහා අවශ්‍ය අමතර කොටස් ලබාදීමට පියවර ගෙන ඇති බවයි.
එමෙන්ම වසර 15කට වඩා පැරණි සීටී ස්කෑන් යන්ත්‍ර 03ක් වෙනුවට නවීන තාක්ෂණයෙන් යුත් යන්ත්‍ර 03ක් කොළඹ ජාතික රෝහලට, කරාපිටිය ශික්ෂණ රෝහලට සහ මාතර දිස්ත්‍රික් රෝහලට ලබාදීමට පියවර ගෙන ඇති බවද එම නිවේදනයේ සඳහන්ය.
මේ අතර, කුරුණෑගල ශික්ෂණ රෝහලේ අක්‍රියව ඇති සීටී ස්කෑන් යන්ත්‍රය සඳහා අවශ්‍ය අමතර කොටස් මෙරටට ගෙන්වා ඇතත් ඒවා නිදහස් කිරීමට රේගුව මෙතෙක් පියවර ගෙන නැතැයි රජයේ විකිරණ විද්‍යා තාක්ෂණවේදීන්ගේ සංගමය චෝදනා කරයි.
එමෙන්ම කළුතර සහ හම්බන්තොට රෝහල්වල සීටී ස්කෑන් යන්ත්‍රද මේ වනවිට බිඳ වැටී ඇති බව එම සංගමය පෙන්වා දෙයි.
මෙරට රජයේ රෝහල්වල පවතින ස්කෑන් යන්ත්‍රවල බිඳවැටීම් පිළිබඳ පසුගිය කාලය පුරාම රජයේ විකිරණ විද්‍යා තාක්ෂණවේදීන්ගේ සංගමය කරුණු අනාවරණ කළේය.
ඔවුන් ප්‍රවෘත්ති සාකච්ඡාවක් පවත්වමින් සඳහන් කළේ කුරුණෑගල ශික්ෂණ රෝහල, කළුතර මහ රෝහල සහ හම්බන්තොට මහ රෝහලේ සීටී ස්කෑන් යන්ත්‍ර 04ක් ද මේ වනවිට බිඳ වැටී ඇති බවයි.
ඒ හේතුවෙන් සීටී ස්කෑන් පරීක්ෂණ සිදු කිරීමට රෝගීන් වෙනත් රෝහල් වෙත යොමුකිරීමට සිදුවීමෙන් විශාල මුදලක් දැරීමට සිදුවන බවත් එම සංගමය පෙන්වා දෙයි.
එමෙන්ම ඔහු පෙන්වා දෙන්නේ කුරුණෑගල ශික්ෂණ රෝහලේ බිඳවැටී ඇති සීටී ස්කෑන් යන්ත්‍රය නඩත්තු කිරීම සඳහා මෙරටට ගෙන්වා ඇති අමතර කොටස් නිදහස් කිරීමට රේගුව තවමත් පියවර ගෙන නොමැති බවයි.
මේ අතර, තත්ත්වයෙන් බාල ඖෂධ නිසා මියගිය, අන්ධභාවයට පත්වූ සහ ආසාත්මිකතා ඇතිවූ සිද්ධින් පිළිබඳ පරීක්ෂණ කරන ලෙස ඉල්ලා වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානය අද අපරාධ පරීක්ෂණ දෙපාර්තමේන්තුවට පැමිණිල්ලක් සිදු කර ඇත.
මේ අතර, අතිකාල දිමනා කප්පාදුවක් මුල් කරගනිමින් මහරගම අපේක්ෂා රෝහලේ විකිරණ විද්‍යා තාක්ෂණවේදී ශිල්පීන් අමතර රාජකාරි රාජකාරිවලින් ඉවත්ව තිබේ.
ඒ අනුව ඔවුන් ඊයේ සවස හතරෙන් පසු විකිරණ ප්‍රතිකාර කිරීමෙන් වැළකී සිටි බව සඳහන්ය.