බීමත්ව යතුරුපැදියක් ධාවනය කිරීම හේතුවෙන් පසුගියදා අම්බලන්ගොඩ පොලීසිය විසින් තරුණයින් දෙදෙනෙකුව අත්අඩංගුවට ගෙන තිබුණි.
එහිදී ඊට විරෝධය පළ කරමින් කාන්තාවක් පොලිස් නිළධාරීන්ගේ රාජකාරියට බාධා කිරීමේ සිද්ධියක් වාර්තා විය.
පසුව එම කාන්තාව සහ අදාළ තරුණයින් දෙදෙනා අධිකරණයට ඉදිරිපත් කිරීමෙන් අනතුරුව මේ මස 30 වනදා දක්වා රක්ෂිත බන්ධනාගාරගත කළ බව පොලිස් මාධ්ය ප්රකාශක, ජ්යෙෂ්ඨ පොලිස් අධිකාරී නීතීඥ නිහාල් තල්දූව මහතා පැවසීය.
ඒ සම්බන්ධයෙන් වැඩිදුරටත් අදහස් දැක්වූ පොලිස් මාධ්ය ප්රකාශක ජ්යෙෂ්ඨ පොලිස් අධිකාරී නීතීඥ නිහාල් තල්දූව මහතා,
“අම්බලන්ගොඩ පොලිස් ස්ථානය මගින් 19 වනදා මධ්යම රාත්රියේදී පුද්ගලයින් දෙදෙනෙකු අත්අඩංගුවට ගත්තා. යතුරුපැදියකින් ගමන් කරමින් සිට ඔවුන් බීමත්ව සිටියා.බීමත් රියදුරන් ලෙස තමයි ඔවුන්ව පොලිස් ස්ථානයට ඉදිරිපත් කළේ.”
“දෙදෙනාම බීමත්ව සිටි නිසා ඒ පොලිස් නිලධාරීන්ට යම් ආකාරයකින් පාලනය කරගන්න බැරුව කටයුතු සිදුවෙලා තිබුණා. අත්අඩංගුවට ගත් පුද්ගලයින් වයස අවුරුදු 27ක් සහ 25ක් වන අම්බලන්ගොඩ ප්රදේශයේම තරුණයින් දෙදෙනෙක්.”
“ඒ අත්අඩංගුවට ගැනීම සම්බන්ධයෙන් විරෝධය පළ කරමින් එක්තරා කාන්තාවක් පොලිස් ස්ථානය ඉදිපිටට පැමිණිලා පොලිස් නිලධාරීන්ට ඉතාම නරක ආකාරයෙන් සහ පරුෂ වචනයෙන් බැනවැදී තිබුණා. අපහාස කරමින් විවිධාකාරයට කටයුතු කරලා තිබුණා. එහිදී ඒ කාන්තාව එම ස්ථානයෙන් ඉවත් කිරීමට කටයුතු කරන්න ගියත් ඒ කාන්තාව එසේ ඉවත්වීමක් සිදුවෙලා තිබුණේ නැහැ.”
“පසුව ඇතිවුණු තත්ත්වයත් එක්ක මේ කාන්තාව අත්අඩංඩගුවට ගැනීමට අම්බලන්ගොඩ පොලීසිය මගින් ක්රියා කරලා තිබුණා. මෙහිදී අත්අඩංගුවට ගත්තට පස්සෙත් මේ කාන්තාව ඒ පොලිස් නිලධාරීන් සමග පොරබදිමින් ඔවුන්ට හිරිහැර වන ආකාරයට කටයුතු කරලා තියෙනවා. සපාකෑම් සිදුකරලා තියෙනවා.”
“කෙසේ වුවත් ඒ කාන්තාව පාලනය කරලා ඇයවත් අත්අඩංගුවට අරගෙන අධිකරණයට ඉදිරිපත් කළා. ඒ අනුව මේ මස 30 වන දින දක්වා රක්ෂිත බන්ධනාගාරගත කිරීමට අධිකරණය මගින් නියෝග කළා.”