මේ වසරේ ජනවාරි සිට ජූලි 20 දක්වා ගතවූ කාලය තුළදී දිවයිනට පැමිණ ඇති සමස්ත සංචාරකයන් ප්‍රමාණය හත් ලක්ෂය ඉක්මවා ඇති බව ශ්‍රී ලංකා සංචාරක සංවර්ධන අධිකාරිය පවසයි.
මේ අතර, කවුඩුල්ල ජාතික වන උද්‍යානය නැරඹීම සඳහා මේ දිනවල පැමිණෙන දෙස් විදෙස් සංචාරයන්ගේ ප්‍රමාණය විශාල ලෙස ඉහළ ගොස් ඇති අතර, අවශ්‍ය පහසුකම් නොමැතිවීමෙන් ඔවුන් දැඩි අපහසුතාවට පත්ව ඇති බව වාර්තා වෙයි.
2023 ජනවාරි සිට ජුලි මස 20 වනදා දක්වා දිවයිනට පැමිණ ඇති සමස්ත සංචාරකයන් සංඛ්‍යාව 714,598කි.
ජූලි මාසයේ ගතවූ දින 20 තුළ පමණක් සංචාරකයන් 89,724 දෙනෙකු පැමිණ ඇති බව ශ්‍රී ලංකා සංචාරක සංවර්ධන අධිකාරිය පවසයි.
2022 වසරේ ජුලි මාසය පුරා මෙරටට පැමිණ ඇත්තේ සංචාරකයන් 47,293ක් වන අතර, ඒ හා සැසඳීමේදී මේ වසරේ ජූලි මාසය තුළ සංචාරකයන්ගේ පැමිණීමේ කැපී පෙනෙන වර්ධනයක් ඇති අයුරු දැකගත හැකිය.
2022 සමස්ත වසරටම මෙරටට පැමිණි සංචාරකයන් ගණන 719,978ක් වෙද්දී මේ වසරේ ජූලි මාසයේ 20 වනදා වන විට පමණක් පැමිණි සංචාරකයන් ගණන හත් ලක්ෂය ඉක්මවීම විශේෂත්වයකි.
ජූලි මස වැඩිම සංචාරකයන් පිරිසක් පැමිණ ඇත්තේ, ඉන්දියාවෙන් වන අතර එක්සත් රාජධානිය සහ චීනය එම ලැයිස්තුවේ දෙවන හා තෙවන ස්ථානයේ පසුවෙයි.
මේ අතර, මත්තල ගුවන් තොටුපොළ වෙත මේ වසරේ ජනවාරි මස සිට අද දක්වා පැමිණ ඇති සමස්ත රුසියානු සංචාරකයන් ප්‍රමාණය 34,164ක් බව වාර්තා වී ඇත.
මේ අතර, ඉන්දියාවේ ‘එම්ප්‍රෙස් ඔෆ් කොඩෙලියා’ මගී ප්‍රවාහන සංචාරක නෞකාව පසුගිය ජුනි මසදී සිව් වතාවක් හම්බන්තොට වරායට පැමිණ තිබේ.
එමගින් සංචාරකයන් 2618 දෙනෙකු මෙරටට රැගෙන ආ බව හම්බන්තොට ජාත්‍යන්තර වරාය පරිපාලනය පවසයි.
චෙන්නායි වරායේ සිට මෙම සංචාරක නෞකාව කන්කසන්තුරේ,ත්‍රිකුණාමලය, හම්බන්තොට, සහ කොළඹ, වරායන් වෙත පැමිණෙයි.
නෞකාවෙන් හම්බන්තොටට පැමිණි සංචාරකයන් දියලුම ඇල්ල, යාල, උඩවලව සහ බූන්දල වනෝද්‍යාන ඇතුළු සංචාරක ආකර්ෂණිය ස්ථාන වෙත කෙටි සංචාර සඳහා පිටත්ව යන බව වාර්තා වී ඇත.
මේ අතර, කවුඩුල්ල ජාතික වන උද්‍යානය නැරඹීම සඳහා මේ දිනවල පැමිණෙන දෙස් විදෙස් සංචාරයන්ගේ ප්‍රමාණය විශාල ලෙස ඉහළ ගොස් තිබේ.
නමුත් එම සංචාරකයන්ට වන උද්‍යානයට පිවිසීමට ප්‍රවේශපත්‍ර නිකුත් කිරීම සඳහා ඇත්තේ, එක් ප්‍රවේශපත්‍ර කවුළුවක් පමණක් වන අතර ඉන් සංචාරකයන් දැඩි අපහසුතාවට පත්ව ඇති බව වාර්තා වෙයි.
සංචාර සඳහා වෙන් කරගෙන ඇති සිය වටිනා කාලය මේ නිසා නිකරුණේ අපතේ යන බවට සංචාරකයෝ මැසිවිලි නගති.