පාර්ලිමේන්තුවේ විපක්ෂය නියෝජනය කරන හිටපු ජනාධිපති මෛත්‍රිපාල සිරිසේන,ඩලස් අහප්පෙරුම,විමල් වීරවංශ, අනුර ප්‍රියදර්ශන යාපා ඇතුළු මන්ත්‍රිවරු 35 දෙනෙකු එක්ව නිදහස් ජනතා සන්ධානය නමින් නව සන්ධානයක් ඊයේ පිහිටුවනු ලැබීය.
ඒ ඉදිරි පළාත් පාලන ඡන්දයට එක්ව තරග කිරීම වෙනුවෙනි.
සන්ධානය පිහිටුවමින් නිදහස ජනතා සභාවේ නායක ඩලස් අලහප්පෙරුම මහතා සඳහන් කළේ නව සන්ධානය පවුල් පාලනයක මුක්කුවක් නොවන බවය.
මෙම නව සන්ධානයට ශ්‍රී ලංකා නිදහස් පක්ෂය, නිදහස ජනතා සභාව, උත්තර ලංකා සභාගය ඇතුළු දේශපාලන පක්ෂ හා කණ්ඩායම් 10ක් එක්ව සිටී.
ශ්‍රී ලංකා නිදහස් පක්ෂ මූලස්ථානයේදී මෙම නව සන්ධානය පිහිටුවීම සිදුකළේය.
අනතුරුව නිදහස් ජනතා සන්ධානයේ මහලේකම් තිලංග සුමතිපාල මහතා ඇතුළු පක්ෂ නියෝජිතයින් නව සන්ධානය පිහිටුවීම සඳහා වන ගිවිසුමට අස්සන් තැබීය.
එ වෙනුවෙන් ශ්‍රී ලංකා නිදහස් පක්ෂ මහ ලේකම් දයාසිරි ජයසේකර , නිදහස ජනතා සභාවේ කැඳවුම්කරු මහාචාර්ය ජී.එල් පීරිස්, උත්තර ලංකා සභාගයේ ප්‍රධාන ලේකම් වෛද්‍ය ජී. වීරසිංහ ජනජය පෙරමුණේ නායක අනුර ප්‍රියදර්ශන, ශ්‍රී ලංකා මහජන පක්ෂයේ ප්‍රධාන ලේකම් අසංක නවරත්න, නිදහස ජනතා පෙරමුණේ ආචාර්ය නාලක ගොඩහේවා ඇතුළු පක්ෂ නියෝජිතයින් අස්සන් කළේය
ඒ අනුව ඉදිරි පළාත් පාලන මැතිවරණයට නිදහස් ජනතා සන්ධානය හෙලිකොප්ටරය ලකුණ යටතේ තරග වැදීමට නියමිතය.
එහිදී අදහස් දැක්වූ උත්තර ලංකා සභාගයේ සභාපති පාර්ලිමේන්තු මන්ත්‍රී විමල් වීරවංශ මහතා,
2023 වසර නොහිතන සමාජ පුපුරායාමක් විය හැකියි එය විවිධ බලවේග අයුතු ලෙස යොදා ගත හැකියි රාජ්‍ය බිඳවැටීමේ තීරණාත්මක අනතුරක් පාමුල ඉන් මුදාගැනීමට මෙම සන්ධානය පිහිටුවනවා ජ.වි.පෙ. කියනවා ජැක් ගහපු කට්ටියක්ලු ජැක්සන්ලා කියන්නෙ මහින්දට 2005 දී ජැක් ගැහුවා චන්ද්‍රිකාගේ පරිවාස ආණ්ඩුවට ජැක් ගැහුවා සරත් ෆොන්සේකාව කරේ තියන් ගියා මෛත්‍රීපාල සිරිසේනටත් වක්‍රාකාරව ජැක් ගැහුවා ජැක් එකේ ප්‍රතිඵලයක් ලෙස රනිල් අගමැති වුණා මෙතන ජැක් නැහැ – නායකත්ව මණ්ඩලයක් ඉන්නෙ
එහිදී අදහස් දැක්වූ පාර්ලිමේන්තු මන්ත්‍රී ඩලස් අලහප්පෙරුම මහතා,
“රටට සතුරු නොවන බලවේග එක්වුණා, චෞර දේශපාලන සංස්කෘතියේ අවසන් පරිච්ඡේදය මෙයයි. රට අයිති පාලකයාට කියලා හිතනවා පාලක පවුල රට බූදලයක් කියලා හිතනවා අපි මේ විනාශය විනෝදයක් කරගන්නෙ නැහැ ගරාවැටෙන පවුල් පාලනයක ආරුක්කුවක් මේ දේශපාලනය වෙනස් කිරීම අපේ අධිෂ්ඨානයයි.”