රෝමය ගිනි ගනිද්දි නීරෝ වීණා වාදනය කළ ආකාරයෙන් රට ගිනිගෙන ආර්ථික ප්රපාතයකට වැටී තිබියදී විපක්ෂය වීනා වාදනය කරන ආකාරයන් මැතිවරණ පවත්වන ලෙස ඉල්ලා සිටින බවත්, එලෙස ඉල්ලීම් කිරීමෙන් රටේ ප්රශ්න නොවිසෙඳන බවත් වරාය, නාවික හා ගුවන් සේවා අමාත්ය නිමල් සිරිපාල ද සිල්වා මහතා පැවසීය.
2023 අයවැය දෙවනවර කියවීම පිළිබඳ අද (21දා) පාර්ලිමේන්තුවේ 06වැනි දිනට පැවති විවාදයට එක්වෙමින් හෙතෙම මේ බව සඳහන් කළේය.
ජනාධිපතිතුමා ඉතාම පැහැදිලිවම කිව්වේ දුෂ්කර හා නිවැරදි මාවත තමන් තෝර ගත්තා කියලා. ඒක ජනප්රිය මාවත නෙවෙයි. විපක්ෂය කල්පනා කරනවා ජනප්රිය ප්රකාශ කරලා ජනප්රිය සටන් පාඨ කියලා ඒ තුළින් බලයට එන්න පුළුවන් වෙයි කියලා. නමුත් අපේ මාවත ජනප්රිය දේශපාලනය කිරීම නෙවෙයි මේ අවස්ථාවේ. දැන් බලන්න මහතීර් මොහොමඩ් මහතා. එතුමා ජනප්රිය දේශපාලනය කරේ නෑ. එතුමා පරාජයට පත්වුණා. නමුත් එතුමා මැලේෂියාව නව රාජ්යක් බවට පත් කිරීම සඳහා අවශ්ය ආර්ථික හා ප්රතිපත්තිමය තීරණය ගත්තා.
ඒ නිසා අද අපිට තිබෙන්නේ අපේ දේශපාලන පැවත්ම පිළිබඳ ප්රශ්නයක් නෙවෙයි. අද තිබෙන්නේ රටේ පැවැත්ම පිළිබඳ, ජනතාවගේ පැවැත්ම පිළිබඳ අපේ ආර්ථිකය ගොඩනැගීමේ ප්රශ්නයක් තිබෙන්නේ. අපිටත් පුළුවන් ජනප්රිය දේශපාලන පාඨ කියලා ජනතාව තාවකාලිකව සනසන්න. නමුත් මේ තිබෙන ආර්ථික අර්බුදයෙන් අපිට ගොඩඑන්න පුළුවන්කමක් නෑ අපි ජනප්රිය නොවන තීරණ ගත්තේ නැතිනම්. අද විපක්ෂය කරන්නේ රෝමය ගිනි ගනිද්දි නීරෝ වීණා වාදනය කළා. ඒ වගේ රට ගිනිගෙන ආර්ථික ප්රපාතයකට වැටිලා තිබෙන වෙලාවේ විපක්ෂය වීණා වාදනය කරනවා මැතිවරණ ඉල්ලලා. ඒ තුළින් මේ රටේ ප්රශ්නය විසඳෙන්නේ නෑ.