දේශගුණික විපර්යාස අවම කර ගැනීමේ ව්‍යාපෘති වෙනුවෙන් මෙරටට විදෙස් ආයෝජන ගෙන්වා ගැනීම සඳහා රජයේ අවධානය යොමුව තිබේ.
පුනර්ජනනීය බලශක්ති සියයට 70ක ඉලක්කය ළඟා කර ගැනීම, 2050 වනවිට කාබන් මධ්‍යස්ථභාවය ලබා ගැනීම සහ කාබන් විමෝචන බලපත්‍ර වෙනුවෙන් වූ ජාත්‍යන්තර වෙළඳපොළ සොයා යෑම යන ඉලක්ක සපුරා ගැනීම සඳහා විදෙස් ආයෝජකයන් ගෙන්වා ගැනීම රජයේ සැලසුම වී ඇති බව ජනාධිපති මාධ්‍ය අංශය සඳහන් කළේය.
මේ සම්බන්ධයෙන් වන සාකච්ඡාවක් දේශගුණික විපර්යාස පිළිබඳ ජනාධිපති උපදේශක රුවන් විජේවර්ධන සහ ජාත්‍යන්තර දේශගුණික විපර්යාස පිළිබඳ ජනාධිපති උපදේශක එරික් සෝල්හයිම් යන මහත්වරුන්ගේ ප්‍රධානත්වයෙන් ජනාධිපති කාර්යාලයේදී පවත්වා තිබේ.
සහනදායී දේශගුණික මූල්‍යකරණය, කාබන් බැර කිරීම, කාබන් වෙළෙඳපො, පුනර්ජනනීය බලශක්තිය සහ හයිඩ්‍රජන් වැනි අනාගත බලශක්ති ප්‍රභව පිළිබඳව සෝල්හෙයිම් මහතා සිය ජාත්‍යන්තර දැනුම එම සාකච්ඡාවට එක්ව සිටි නිලධාරින් සමග හුවමාරු කර ගත් ජනාධිපති මාධ්‍ය අංශය සඳහන් කළේය.
ඉන්දීයාව හා චීනය වැනි රටවල් එහි ප්‍රබල වාසි රැසක් හිමි කර ගෙන ඇති අතර ශ්‍රී ලංකාවට ද එම වාසි අත්කර ගත හැකි බව සෝල්හයිම් මහතා එහිදී ප්‍රකාශ කර ඇත.
එමෙන්ම ජනාධිපති රනිල් වික්‍රමසිංහ මහතා මෙරටට බලපා ඇති සියලු ප්‍රශ්න විසඳනු ඇති බවට තමන් විශ්වාස කරන බව ද ඔහු එහිදි කියා සිටි බව ජනාධිපති මාධ්‍ය අංශය සඳහන් කරයි.
පුනර්ජනනිය බලශක්ති අංශය වේගයෙන් වර්ධනය වන අංශයක් වන බැවින් යුරෝපා, අමෙරිකා, කැනඩාව ඇතුළු රටවල එවැනි ආයෝජකයින් විශාල වශයෙන් සිටින බව එම සාකච්ඡාවට එක්වෙමින් රුවන් විජේවර්ධන මහතා ප්‍රකාශ කර ඇත.
පුනර්ජනනීය බලශක්තිය පිළිබඳ සමුළුවක් ඉදිරියේදී පැවැත්වීමට නියමිත අතර එමගින් ආයෝජකයින් අප රටට ආකර්ශනය කර ගැනීමට හැකියාව ලැබෙනු ඇති බව ඔහු එහිදී වැඩිදුරටත් පවසා තිබේ.