ජාතික ඩිජිටල් ප්රතිපත්තියක් නොමැතිවීමේ ගැටලුව හේතුවෙන් ලොව අනෙක් රටවල් අතර ශ්රී ලංකාව දැඩි පසුබෑමකට ලක්ව ඇති බව ආර්ථීක ස්ථායීකරණය සඳහා වූ ජාතික සභාවේදී අනාවරණය වී තිබේ.
මෙම ක්ෂේත්රය දියුණුවට ලක් කිරීමෙන් අමෙරිකානු ඩොලර් බිලියන 5ක මුදලක් රටට ඉපැයිය හැකි බවද එහිදී අනාවරණය වුනි.
තොරතුරු තාක්ෂණ ක්ෂේත්රයට අදාළ ගැටලු සහ ඒ සඳහා යෝජනා ඉදිරිපත් කිරීම සම්බන්ධයෙන්ද එහිදී සාකච්ඡාවට ලක්ව තිබේ.
මේ සඳහා විද්වතුන්, රාජ්ය ආයතන ප්රධානීන් හා පෞද්ගලික සමාගම් ප්රධානීන් ඇතුළු විශාල පිරිසක් එක්ව තිබේ.
වත්මන් ආර්ථික අර්බුදයත් සමග තොරතුරු තාක්ෂණ ක්ෂේත්රයේ වසර ගණනාවක පළපුරුද්ද සහ අත්දැකීම් සහිත වෘත්තිකයින් රට හැර යාම ප්රධානතම ගැටලුවක් බව මෙහිදී අවධාරණය කෙරුණි.
එහිදී වැඩිදුරටත් අදහස් දැක්වූ ආර්ථික ස්ථායීකරණය සඳහා වූ වැඩසටහන් හඳුනාගැනීම වෙනුවෙන් වූ ජාතික සභාවේ සභාපති පාර්ලිමේන්තු මන්ත්රී පාඨලී චම්පික රණවක මහතා.
“දැනට ලංකාවේ තොරතුරු තාක්ෂණ ක්ෂේත්රය නිවැරදිව දියුණු කරගත්තොත් පන් ලක්ෂයකට පමණ රැකියා අවස්ථා ලබාදෙන්න පුළුවන් තත්ත්වයක් තියෙන තැනක්. ඩොලර් මිලියන 5ක් පමණ ලබාගන්න පුළුවන් තැනක්. දැනට මේක ඩොලර් මිලියන 1ත් 1.5ත් අතර ආදායමක් උපයන, ඇත්තටම ගත්තොත් තේ, පොල්, රබර් තුනටම වඩා හොඳ ආදායමක් ගෙනදෙන ක්ෂේත්රයක් නමුත් පළවෙනි කාරණය මේ සම්බන්ධයෙන් නිශ්චිත ජාතික ප්රතිපත්තියක් ක්රියාත්මක නොවීම නිසා අපේ පිරිස් දැනටමත් රට හැරයාමේ තර්ජනයක් මත බොහොමයක් දේශීය සමාගම් අධෛර්යට පත්වෙලා ඉන්නවා.”