ස්වාධීන පොලිස් කොමිසමේ කටයුතුවලට දේශපාලන අධිකාරිය මැදිහත්වීම හේතුවෙන් අවංකව සේවය කරන පොලිස් නිලධාරීන් වෙනත් ප්රදේශවලට මාරු කිරීමට කටයුුතු කරන්නේ කෙසේද යන්න පිළිබඳව මීගොඩ ප්රදේශවාසීන් ප්රශ්න කර සිටී.
මීගොඩ පොලිස් ස්ථානයට අනුයුක්තව ප්රජා පොලිස් ඒකකයේ සේවය කළ පොලිස් කොස්තාපල්වරයෙකු ප්රාදේශීය සභා මන්ත්රිවරයෙකුගේ ඉල්ලීම මත ස්ථාන මාරුකිරීම පිළිබඳ පැවති ප්රවෘත්ති සාකච්ඡාවකට එක්වෙමින් ප්රදේශවාසීන් මේ පිළිබඳව ප්රශ්න කර සිටියේය.
මීගොඩ පොලිස් ස්ථානයට අනුයුක්තව ප්රජා පොලිස් ඒකකයේ සේවය කළ පොලිස් කොස්තාපල් සුරංග දිනාල් පෙරේරා “ප්රාදේශීය සිවිල් ආරක්ෂක කමිටුවේ රාජකාරී කටයුතුවලදී අපක්ෂපාතීව කටයුතු නොකරන බැවින්” ඔහුව වෙනත් පොලිස් ස්ථානයට මාරුකරන ලෙස ශ්රී ලංකා පොදුජන පෙරමුණේ හෝමාගම ප්රාදේශීය සභා මන්ත්රි කමල් චන්දන මහතා විසින් එහි ආසන සංවිධායක අමාත්ය ආචාර්ය බන්දුල ගුණවර්ධන මහතාගෙන් ලිඛිතව ඉල්ලා තිබුණි.
ඒ අනුව එම ලිපියට අමාත්ය බන්දුල ගුණවර්ධණ මහතා විසින් සටහනක් තබමින් මහජන ආරක්ෂ අමාත්ය ටිරාන් අලස් මහතාගෙන් ඉල්ලා ඇත්තේ අදාළ පොලිස් නිලධාරීයාගේ ස්ථානමාරුව පිළිබඳ සලකාබලන ලෙසය.
එහි ප්රතිඵලයක් ලෙස මේ වනවිට සුරංග දිනාල් පෙරේරා නමැති පොලිස් කොස්තාපල්වරයා පොලිස්පතිගේ නියෝග මත මානව සම්පත් කළමනාකරණ සහ ජාත්යන්තර සබඳතා දිශාව භාර නියෝජ්ය පොලිස්පති සිසිර කුමාර මහතාගේ අත්සනින් යුතුව කිලිනොච්චිය පොලිස් ස්ථානය වෙත මරුකර යවා තිබේ.
මෙම පොලිස් නිලධාරියා ස්ථානමාරු කිරීම සම්බන්ධයෙන් සිවිල් ආරක්ෂක කමිටු සාමාජිකයින් අමාත්ය බන්දුල ගුණවර්ධන මහතාගේ ක්රියාකලාපය දැඩිලෙස විවේචනයට ලක් කළේය.