කෝට්ටේ ශ්‍රී ජයවර්ධනපුර රෝහලෙහි පරිපාලනය විසින් සිදුකර ඇති අක්‍රමිකතා රැසක් විගණකාධිපති වාර්තාවෙන් අනාවරණයවීම පිළිබඳව පාර්ලිමේන්තු පොදු ව්‍යාපාර පිළිබඳ කාරක සභාව හෙවත් කෝප් කමිටුවේදී අවධානය යොමුවී තිබේ.
කෝප් කමිටු සභාපති මහාචාර්ය රංජිත් බණ්ඩාර මහතා ශ්‍රී ජයවර්ධනපුර රෝහලේ පාලනාධිකාරියෙන් ඒ පිළිබඳව ප්‍රශ්න කර සිටියේය.
රෝහල් භූමියට අයත් ඉඩම් වෙනත් පාර්ශ්ව විසින් අත්පත් කරගැනීම මෙන්ම හඳුනාගැනීමට සිදු කළ මැනුම් කටයුත්තේ ද අක්‍රමිකතාවක් සිදුවී ඇති බව එහිදී අනාවරණය වුණි.
මේ සම්බන්ධයෙන් රංජිත් බණ්ඩාර මහතා සහ විගණකාධිපති ඩබ්ලිව්.පී.සී වික්‍රමරත්න මහතා විමසා සිටි අතර රෝහල් අධ්‍යක්ෂ වෛද්‍ය රත්නසිරි හේවගේ මහතා ඊට ප්‍රතිචාර දැක්වීය.
කෝප් කමිටුවේ සභාපති මහාචාර්ය රංජිත් බණ්ඩාර මහතා,
“සොෆ්ට්වෙයාර් ඩිවලොප්මන්ට් එකකට විශාල මුදලක් අත්තිකාරම් දීලා තිබුණා.. කෝ ඒක. ඒ වගේම අතිරික්ත තොග කල්ඉකුත්වෙච්ච ඒවා සම්බන්ධයෙන් විගණකාධිපති නිර්දේශ ඉදිරිපත් කරලා තිබෙනවා. කෝ ඒවා.. සභාපතිතුමා දැන් කියන්න එපා.. මම හිටපු නැති කාලේ ඒවා කියලා. අපි අහන්නේ මේ පෙන්වා දුන් කරුණු සම්බන්ධයෙන් ගත් ක්‍රියාමාර්ග මොනවාද?..ඔය රෝහලේ ඉඩම් වටෙන්ම අල්ලගෙන..ඔබතුමා දන්නේ නැහැ. ඔබතුමාලා කරේ, මැනලා මේ ටික තමයි ඉඩම් තියෙන්නේ කියලා කිව්වා. එතකොට බලහත්කාරයෙන් අල්ලගත් ඒවා.”
විගණකාධිපති ඩබ්ලිව්.පී.සී වික්‍රමරත්න මහතා,
“සර්වේයර් ජනරාල් මේක මැනලා පැහැදිලිවම කියලා තිබුණා මෙච්චර ප්‍රමාණයක් මෙන්න මේ මේ පුද්ගලයෝ තමයි අල්ලගෙන ඉන්නේ කියලා. නමුත් එක්කම දීලා තිබුණා.
ඔබතුමන්ලා කළේ, ඒක පැත්තකින් තියලා පුද්ගලික සර්වේයර් කෙනෙක් දාලා මැන්නා. ඒක තමයි පිළිගත්තේ. රජයේ සර්වේයර් කියන එක පිළිගත්තේ නැහැ.”
රෝහල් අධ්‍යක්ෂ, විශේෂඥ වෛද්‍ය රත්නසිරි හේවගේ මහතා,
“අපි දැනුවත් වූ වහාම නීතිපති උපදෙස් ලබාගත්තා. දැන් වැඩකටයුතු කරගෙන යනවා. පර්චස් 165ක් අපිට නැතිවෙලා තිබෙනවා.”
ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී මධුර විතානගේ මහතා,
” මිනිස්සු කියනවා.. මේ ඉඩම් අල්ලගෙන හොස්ටල් දාලා ලු. හොස්පිටල් එකටම දෙනවලු කුලියට. ජයවර්ධනපුර රෝහලේ ඉඩමක් අල්ලගන්න එක සාමාන්‍ය දෙයක් ද?. මහා දැවැන්ත වංචාවක්.”
විගණකාධිපති ඩබ්ලිව්.පී.සී වික්‍රමරත්න මහතා,
“මට පේන්නේ මේ ආයතනය මේකට අනුබල දුන්නා කියන එක. නැත්තම් පුද්ගලික සර්වේයර් ගේ එක නගර සභාවේ රෙජිස්ටර් කරන්නත් සර්වේයර් ජනරාල්ගේ එක රෙජිස්ටර් නොකරන්නත් හේතුව මොකක්ද?.”