ශ්රී ලංකාවේ සංවර්ධන ක්රියාවලියට ආසියානු සංවර්ධන බැංකුවේ (ADB) අඛණ්ඩ සහාය ලබාදෙන බව එහි නව දේශීය අධ්යක්ෂ ෂැනන් කව්ලින් මහත්මිය පවසයි.
ශ්රී ලංකාව සඳහා අලුතින් පත් වූ එම බැංකුවේ දේශීය අධ්යක්ෂවරිය වන කව්ලින් මහත්මිය ඊයේ (12) පස්වරුවේ ජනාධිපති අනුර කුමාර දිසානායක මහතා හමුවූ අවස්ථාවේදී මේ බව පවසා ඇත.
මේ සම්බන්ධයෙන් නිවේදනයක් නිකුත්කරමින් ජනාධිපති මාධ්ය අංශය සඳහන් කළේ, වසර ගණනාවක් පුරා ගොඩනඟා ගත් ශක්තිමත් හවුල්කාරිත්වය මත පදනම්ව ශ්රී ලංකාව සමග පවතින සබඳතා තවදුරටත් පුළුල් කර ගැනීමට ඇය අපේක්ෂා කරන බවය.
නව අධ්යක්ෂවරිය නිල වශයෙන් ජනාධිපතිවරයාට හඳුන්වා දීම ආසියානු සංවර්ධන බැංකුවේ කලාපීය අධ්යක්ෂවරයා විසින් සිදු කෙරිණි.
ආසියානු සංවර්ධන බැංකු ආධාර යටතේ මෙරට ක්රියාත්මක වැඩසටහන් ශ්රී ලංකාව විසින් ක්රියාත්මක කරනු ලැබ ඇති ආකාරය සහ ආයතනික සම්බන්ධීකරණ ක්රියාවලියේ පවතින ඵලදායිතාව පිළිබඳව නියෝජිත පිරිස මෙහිදී සතුට පළකර ඇත.
‘දිට්වා’ සුළි කුණාටුවෙන් සිදුවූ ව්යසනය පිළිබඳවද මෙම සාකච්ඡාවේදී ප්රමුඛ අවධානයක් යොමුව ඇති අතර, යථා තත්ත්වයට පත්කිරීමේ වැඩපිළිවෙළ සහ ප්රතිසංස්කරණ කටයුතු වේගවත් කිරීම වෙනුවෙන් රජය ආරම්භ කර තිබෙන වැඩපිළිවෙළ පිළිබඳවද සාකච්ඡා කර තිබේ.
මේ අතර වත්මන් රජය යටතේ ළඟා කර ගත් ආර්ථික ප්රගතිය විශේෂයෙන් අවදානමට ලක්විය හැකි ප්රදේශවල සිටින ජනතාව වෙත දැනෙන සුලු ලෙස ගලායාමට සැලැස්වීම රජයේ අරමුණ බව ජනාධිපති අනුර කුමාර දිසානායක මහතා මෙහිදී පෙන්වා දී ඇත.
එමෙන්ම මධ්යම කඳුකරය සහ කඳුකර ප්රදේශ ආශ්රිතව පවතින දිගුකාලීන පාරිසරික බලපෑම්ද පැහැදිලි කරමින්, එම පරිසර පද්ධති යථා තත්ත්වයට පත් කිරීම, ජල මූලාශ්ර ආරක්ෂා කිරීම සහ බලපෑමට ලක්වූ ප්රජාව සඳහා ස්ථිර ජීවනෝපාය මාර්ග සකස් කරදීම සඳහා වන කඩිනම් අවශ්යතාව ජනාධිපතිවරයා අවධාරණය කළේය.
මේ තත්ත්වවලට මුහුණ දීම සඳහා දිගුකාලීන වැඩපිළිවෙළක අවශ්යතාව පෙන්වා දුන් ජනාධිපතිවරයා, එම අභියෝගවලට මුහුණ දීම සඳහා ආසියානු සංවර්ධන බැංකුව ලබා දෙන සහාය කෘතවේදීව පිළිගන්නා බවද පවසා ඇත.
මෙහිදී ආසියානු සංවර්ධන බැංකුව විසින් 2026 වසරේ සිට මෙරට සිදුකිරීමට සැලසුම් කර ඇති ආයෝජන, ලබාදීමට අපේක්ෂිත අයවැය සහාය සහ මෙම වසරේ මැදභාගයේදී සිදු කිරීමට නියමිත ආසියානු සංවර්ධන බැංකුවේ සභාපතිවරයාගේ ශ්රී ලංකා සංචාරය ඇතුළු ඉදිරි සැලසුම් පිළිබඳව සාකච්ඡා කර තිබේ.