ඊයේ (05) දිනය තුළ දිවයිනේ ප්‍රදේශ කිහිපයක සිදුවු මාරක අනතුරු 5කින් පුද්ගලයින් 5 දෙනෙකු ජීවිතක්ෂයට පත්ව ඇතැයි පොලීසිය පවසයි.
ඊයේ අලුයම හිඟුරක්ගොඩ, පන්සල්ගොඩැල්ල තල්පොත මාර්ගයේ 07 කණුව ප්‍රදේශයේදී පන්සල්ගොඩැල්ල දෙසට ධාවනය වූ යතුරුපැදියක් පැදිකරුට පාලනය කර ගැනීමට නොහැකිව මාර්ගයෙන් ඉවතට පැන පෙරළී අනතුරක් සිදුව ඇත.
අනතුරින් තුවාල ලැබූ 28 හැවිරිදි යතුරුපැදිකරු ගල්අමුණ රෝහලට ඇතුළත් කිරීමෙන් පසු මියගොස් ඇත.
මේ අතර, ඊයේ උදෑසන වාරියපොල, අනුරාධපුර – පාදෙණිය මාර්ගයේ කුඹුක්ගහමුල හන්දිය ආසන්නයේදී අනුරාධපුර දෙසට ධාවනය වූ යතුරුපැදියක් මාර්ගයේ දකුණු පසට හැරවීමට යාමේදී පසුපසින් පැමිණි බස් රථයක ගැටීමෙන් අනතුරක් සිදුව ඇත.
අනතුරින් තුවාල ලැබූ යතුරුපැදිකරු හා පසුපැදිකරු වාරියපොල රෝහලට ඇතුළත් කිරීමේදී 30 හැවිරිදි පැදිකරු මියගොස් ඇති අතර පසුපැදිකරු වැඩිදුර ප්‍රතිකාර සඳහා කුරුණෑගල රෝහලට මාරුකර යවා තිබේ.
මෘත ශරීරය කුරුණෑගල රෝහලේ මෘත ශරීරාගාරයේ තැන්පත් කර ඇති අතර, අනතුරට සම්බන්ධ බස් රථ රියදුරු අත්අඩංගුවට ගෙන ඇති අතර වාරියපොල පොලීසිය වැඩිදුර විමර්ශන සිදුකරයි.
මේ අතර, ඊයේ උදෑසන කැලණිය, බියගම මාර්ගයේ රග්ගහවත්ත ප්‍රදේශයේදී බියගම දෙසට ධාවනය වූ යතුරුපැදියක් පැදිකරුට යතුරුපැදිය පාලනය කර ගැනීමට නොහැකිව අසල සංඥා කණුව ගැටී අනතුරක් සිදුව ඇත.
අනතුරින් බරපතළ තුවාල ලැබූ 25 හැවිරිදි යතුරුපැදිකරු බියගම රෝහලට ඇතුළත් කිරීමේදී මියගොස් තිබේ.
මේ අතර, ඊයේ රාත්‍රියේ මැදවච්චිය – හොරව්පතාන මාර්ගයේ මැදවච්චිය ප්‍රදේශයේදී මැදවච්චිය දෙසට ධාවනය වූ වෑන් රථයක් මාර්ගය අයිනේ සිටි පදිකයෙකුගේ ගැටී අනතුරක් සිදුව ඇත.
අනතුරින් බරපතළ තුවාල ලැබූ 34 හැවිරිදි පදිකයා මැදවච්චිය රෝහලට ඇතුළත් කිරීමෙන් පසු මියගොස් තිබේ.
මේ අතර, ඊයේ රාත්‍රියේ හෝමාගම වලව්ව හන්දිය උණපඳුර හන්දිය අතුරු මාර්ගයේ නගරසීමා මාවත අසලදී උණපඳුර හන්දිය දෙසට ධාවනය වූ යතුරුපැදියක් පැදිකරුට යතුරුපැදිය පාලනය කර ගැනීමට නොහැකිව මාර්ගයෙන් ඉවතට පැන විදුලි රැහැන් කණුවක ගැටී අනතුරක් සිදුව ඇත.
අනතුරින් බරපතළ තුවාල ලැබූ පැදිකරු හා පසුපැදිකරු හෝමාගම රෝහලට ඇතුළත් කිරීමේදී 17 හැවිරිදි පැදිකරු මියගොස් තිබේ.
මෘත ශරීරය හෝමාගම රෝහලේ මෘත ශරීරාගාරෙයේ තැන්පත් කර ඇති අතර හෝමාගම පොලීසිය වැඩිදුර විමර්ශන සිදුකරනු ලබයි.