බංග්ලාදේශ කණ්ඩායම ලකුණු 41කික් පරාජය කර ආසියානු කුසලාන විස්සයි20 ක්‍රිකට් තරගාවලියේ අවසන් මහා තරගයට සුදුසුකම් ලබාගැනීමට ඉන්දීය කණ්ඩායම සමත් විය.
සුපිරි 4 වටයේ ඊයේ (24) රාත්‍රියේ පැවති මෙම තරගයේ ඉන්දීය කණ්ඩායමෙන් හිමි වූ ලකුණු 169ක ඉලක්කයට පිළිතුරු ලෙස බංග්ලාදේශයට රැස්කළ හැකිවූයේ පන්දුවාර 19.3කදී සියලු දෙනා දැවී ලකුණු 127ක් පමණි.
ඉන්දියාව ලැබූ මෙම ජයත් සමග ශ්‍රී ලංකාවට එරෙහි තරගය ඉතිරිව තිබියදීම ඔවුන්ට අවසන් මහා තරගයට සුදුසුකම් ලබාගැනීමට හැකිවිය.
පාකිස්තානය හමුවේ ලැබූ පරාජයත් සමග අවසන් මහා තරගය නොපෙන ඈතක තිබූ ශ්‍රී ලංකාවට අවසන් මහා තරගය ගැන යම්කිසි හෝ බලාපොරොත්තුවක් තබාගැනීමට නම් මෙම තරගයෙන් බංග්ලාදේශ කණ්ඩායම ජයගත යුතුව තිබුණි.
ඒ අනුව නොනිල ලෙස තරගාවලියෙන් ඉවතට විසිව සිටි ශ්‍රී ලංකාව අද නිල වශයෙන්ම ඉවත් විය.
සුපිරි 4 වටයේ තරග අවසන් කරමින් බංග්ලාදේශ – පාකිස්තානය තරගය අද (25) පැවැත්වේ.
එම තරගයෙන් ජයගන්නා කණ්ඩායමට අවසන් මහා තරගයට සුදුසුකම් ලබාගැනීමට හැකිය.