ටී 56 වර්ගයේ ගිනිඅවියක් සහ උණ්ඩ 113ක් හා අයිස් මත්ද්‍රව්‍ය සමඟ සැකකාරියක් හා සැකකරුවෙකු අත්අඩංගුවට ගෙන තිබේ.
ඊයේ (01) උදෑසන කාලයේ එම සැකකරුවන් අත්අඩංගුවට ගෙන ඇති බව පොලීසිය පවසයි.
වත්තල පොලිස් වසමේ හේකිත්ත පාර වත්තල ප්‍රදේශයේ පිහිටි ලැඟුම්හලක කාමරයක් තුළ කාන්තාවක් ගෙල වැලලාගෙන සිටින බවට වත්තල පොලිස් ස්ථානයට ලද පැමිණිල්ලක් මත වත්තල පොලීසිය විසින් විමර්ශන ආරම්භ කර තිබුණි.
විමර්ශන සිදුකළ නිලධාරින් හට ලැඟුම්හලේ නාන කාමරයක් තුළ කාන්තාවක් සිහිසුන්ව සිටිනු නිරීක්ෂණය වී ඇත.
එම කාන්තාව නැවත සිහි ගැන්වීමට කටයුතු කර ඇති අතර අනතුරුව ඇය පරීක්ෂා කිරීමේදී අයිස් මත්ද්‍රව්‍ය ග්‍රෑම් 06 මිලිග්‍රෑම් 100ක් ඇය සන්තකයේ තිබීම හේතුවෙන් පොලිස් භාරයට ගෙන ඇත.
අත්අඩංගුවට ගත් සැකකාරිය වයස අවුරුදු 35ක් වන කොළඹ 15 ප්‍රදේශයේ පදිංචිකාරියකි.
සැකකාරියගෙන් සිදුකළ වැඩිදුර ප්‍රශ්න කිරීමේදී මෙම කාන්තාව විදේශ ගතව සිටිමින් මත්ද්‍රව්‍ය බෙදාහරින්නෙකු සමග සමීප සම්බන්ධතා පවත්වන බවට හා මත්ද්‍රව්‍ය ජාවාරම්කරු විසින් සුරක්ෂිතව තැබීම සඳහා ඇය වෙත ලබා දෙන ලද ටී 56 ගිනිඅවියක් හා පතරොම් 113ක් සම්බන්ධයෙන් තොරතුරු අනාවරණය කර ගෙන ඇත.
මෙම සැකකාරියගේ මඟ පෙන්වීම මත ඇය පදිංචිව සිටින දෙවන විවාහයේ සැමියා පදිංචි රාගම ප්‍රදේශයේ නිවසක සඟවා තිබියදී පොලිසිය විසින් එම අවිය හා පතරොම් සොයා ගෙන ඇත.
එම ටී 56 ගිනිඅවිය හා පතරොම් සඟවා තිබූ හීන්කෙන්ද, රාගම නිවසේ පදිංචි සැකකාර කාන්තාවගේ වයස අවුරුදු 40ක් වන සැමියාද වත්තල පොලීසිය විසින් අත්අඩංගුවට ගෙන වැඩිදුර විමර්ශන සිදුකරනු ලබයි.