දිවයින පුරා සිදුවූ මාරක රිය අනතුරු දෙකකින් පුද්ගලයින් දෙදෙනෙකු ජීවිතක්ෂයට පත්ව තිබේ.
පොලීසිය පැවසුමේ මෙම අනතුරු ඊයේ (15) සහ අද (16) අලුයම් කාලයේදී සිදුව ඇති බවය.
ඒ අනුව පේරාදෙණිය පොලිස් වසමේ ගම්පොල පේරාදෙණිය මාර්ගයේ අඟුනාවල ප්‍රදේශයේදී මහනුවර දෙස සිට ගම්පොල දෙසට ධාවනය වූ මෝටර් රථයක් මාර්ගයෙන් ඉවතට පැන තාප්පයක ගැටීමෙන් අනතුරක් සිදුව තිබේ.
අනතුරින් මෝටර් රථයේ ඉදිරිපස අසුනේ ගමන් ගත් කාන්තාවක් හා පසුපස අසුනේ ගමන් ගත් කාන්තාවක් බරපතළ තුවාල ලබා පේරාදෙණිය රෝහලට ඇතුළත් කිරීමට පියවර ගෙන තිබුණි.
එහිදී ඉදිරිපස අසුනේ ගමන් ගත් කාන්තාව ජීවිතක්ෂයට පත්ව තිබේ.
මියගොස් ඇත්තේ අවුරුදු 58ක් වූ වෙළම්බඩ ප්‍රදේශයේ පදිංචිකාරියකි.
මෝටර් රථයේ රියදුරුට නින්ද යාම හේතුවෙන් මෙම අනතුරු සිදුව ඇති බවට දැනට කරන ලද විමර්ශනයේදී අනාවරණය වී තිබේ.
මෝටර් රථයේ රියදුරු අත්අඩංගුවට ගෙන ඇති අතර සිද්ධිය සම්බන්ධව පේරාදෙණිය පොලිසිය වැඩිදුර විමර්ශන සිදුකරති.
මේ අතර වැලිවේරිය පොලිස් වසමේ වැලිවේරිය ඇඹරළුව මාර්ගයේ ඇඹරළුව ප්‍රදේශයේදී වැලිවේරිය දෙස සිට කන්දකපාපු හන්දිය දෙසට ධාවනය කළ යතුරු පැදියක් පැදිකරුට පාලනය කර ගැනීමට නොහැකිව මාර්ගයේ පෙරළී ගොස් ප්‍රතිවිරුද්ධ දිශාවෙන් පැමිණි ලොරි රථයක ගැටී අනතුරක් සිදුව තිබේ.
අනතුරින් යතුරුපැදිකරු බරපතළ තුවාල ලබා ගම්පහ රෝහලට ඇතුළත් කිරීමට පියවර ගෙන ඇති අතර එහිදි ඔහු ජීවිතක්ෂයට පත්ව තිබේ.
මියගොස් ඇත්තේ අවුරුදු 21ක් වූ ඇඹරලුව උතුර ප්‍රදේශයේ පදිංචිකරුවෙකි.